‘आमा’ गीतमा भिडिओ बनाउनुहोस्, नगद पुरस्कार जित्नुहोस्

काठमाडौं । आभाश्री प्रडक्सनले आउँदो मातातीर्थ औंसीको अवसर पारेर ‘आमा’ बोलको गीतमा म्युजिक भिडिओ बनाउने प्रतियोगिता अघि सारेको छ ।

आभाश्रीले आफ्नो आधिकारिक युट्युब च्यानलमा एक वर्षअघि सार्वजनिक गरेको ‘आमा’ बोलको गीतमा म्युजिक भिडिओ बनाउने प्रतियोगिता सार्वजजिक गरेको हो ।

चर्चित गायिका मेलिना राई र युवा गायक रोशन धौभडेलको स्वर रहेको उक्त गीतको म्युजिक भिडिओ बनाउने प्रतियोगिताका तीन विजेतालाई आभाश्री प्रडक्सनले नगद पुरस्कारको व्यवस्था गरेको छ ।

गीतका रचनाकार एवं आभाश्री प्रडक्सनका उत्कल चालिसेले प्रतियोगितामा पहिलो पुरस्कार १५ हजार, दोस्रो १० हजार र तेस्रो पुरस्कार ५ हजार रुपैयाँ राखिएको जानकारी दिए ।

उनले भिडियो एन्ड्रोइड मोबाइलबाट समेत खिचेर पठाउन मिल्ने बताए । जुन भिडियो यही चैत ३१ गतेभित्र ह्वाट्सएप नम्बर ३५२६६१४५५३९० मा पठाउन सकिने उत्कलले जानकारी दिए ।

प्रतियोगिताका विजेताहरु मातातीर्थ औंसीको दिन घोषणा गर्ने उनले बताए । मातातीर्थ औंसी २०८२ साल बैशाख १४ गते परेको छ ।

आभाश्रीको आधाकारिक युट्युब च्यानलबाट एक वर्षअघि सार्वजनिक गरिएको गीतमा गायक रोशन धौभडेलले नै संगीत भरेका छन् । त्यस्तै एरेन्ज प्रमोद परियार र मिक्सिङ गोविन्द सोनीले गरेका हुन् ।

उत्कलले २ वर्षअघि रोशन धौभडेलकै आवाजमा ‘पीडा’ बोलको गीत बजारमा ल्याएका थिए । उक्त गीत पनि आभाश्री प्रडक्सनको आधिकारिक युट्युब च्यानलबाट रिलिज गरिएको थियो ।