हात्तीसार क्याम्पसमा स्वतन्त्रले जिते सभापति, सुनसरीका ५ मध्ये ४ वटामा नेविसंघले मार्‍यो बाजी

विराटनगर । सुनसरीका विभिन्न ५ वटा क्याम्पसमा भएको स्ववियू चुनावमा ४ वटामा नेपाल विद्यार्थी संघले सभापति जितेको छ । सुनसरीका केही क्याम्पसहरूमा भने विवादका कारण निर्वाचन हुन सकेन ।

सुनसरीको केन्द्रीय प्रविधि क्याम्पस हात्तीसारमा भने स्वतन्त्र उम्मेदवार पेशलराज कार्कीले सभापति जितेका छन् । उनलाई अनेरास्ववियू क्रान्तिकारीको समर्थन थियो ।

जिल्लाको सबैभन्दा ठूलो क्याम्पस धरानस्थित महेन्द्र बहुमुखी क्याम्पसमा नेविसंघका प्रशान राई विजयी भए । यहाँ नेविसंघ र अनेरास्ववियुको संयुक्त प्यानल थियो ।

यसैगरी पूर्वाञ्चल इन्जिनियरिङ क्याम्पसमा नेविसंघका सभापति सागर बस्याल विजयी भएका छन् । इनरुवाको सुनसरी बहुमुखी क्याम्पसमा पनि नेविसंघका सुनिलकुमार मण्डल सभापतिमा विजयी भएका छन् । बराहक्षेत्र नगरपालिका चक्रघट्टीको सप्तकोशी बहुमुखी क्याम्पसमा नेविसंघका विज्ञान सावा लिम्बू विजयी भए ।

निर्वाचन भएका कुनै पनि क्याम्पसमा अनेरास्ववियु र क्रान्तिकारीले सभापति जिताउन सकेनन् । सुनसरीको इटहरीमा रहेको जनता बहुमुखी क्याम्पसमा भने विवादका कारण निर्वाचन हुन सकेको छैन । पिण्डेश्वर क्याम्पसमा भने अनेरास्ववियुका उम्मेदवार यसअघि नै सर्वसम्मत निर्वाचित भएका थिए ।