हरेक शुक्रबार ‘फ्राईडे नाइट विथ ह्याप्पियस्ट म्यान’ गर्दै भुठान

काठ्माडौं। आगामी वैशाख १२ बाट प्रदर्शनमा आउन लागेको चलचित्र ुभूठानुले हरेक शुक्रवार काठमाडौका चल्तीका चियापसल र रेष्टुँराहरुमा फ्राईडे नाईट विथ ह्याप्पियस्ट म्यान क्याम्पेन गर्ने भएको छ ।

चलचित्रका निर्माता अविरल थापाका अनुसार यो कार्यक्रम गर्नुको अभिप्राय चलचित्रका दर्शकसँग प्रत्यक्ष साक्षात्कर गर्नु र सिनेमाको बारेमा गफ गर्दै मनोरञ्जन गर्नु हो। थापाका अनुसार मार्च २० तारिखलाई संयुक्त राष्ट्र संघले अन्तराष्ट्रिय खुशी दिवसको रुपमा मनाउँदै आएको र सोही अवसर पारेर वैशाख ५ गतेसम्म खुशीको हप्ता मनाउने कार्यक्रम घोषणा गरिएको हो ।

भुठानले थापाथलीस्थित चियावालामा चैत्र ८ गते साँझ ५ः३० मा पहिलो कार्यक्रम गर्नेछ। यो कार्यक्रममा चियापसलमा आएका जो कसैले आफनो गीत, कविता, मुक्तक, गजल, क्यारिकेचर प्रस्तुत गर्न सक्ने साथै चलचित्र ‘भूठान’को टिजर र गीतको समीक्षा पनि गर्न सक्नेछन्। हरेक हप्ता एकजना सेलिब्रेटीलाई सो कार्यक्रममा ह्यापियस्ट गेस्टको रुपमा निमन्त्रणा गरिनेछ ।

यो हप्ता कवि एवं संचारकर्मी रुपेश श्रेष्ठले प्रमुख अतिथीको रुपमा आफ्नो प्रस्तुती दिनेछन्। कार्यक्रममा उपस्थित मध्य ३ जनाले लक्की ड्रमार्फत भूठानको टिकट पनि जित्नेछन्।

आप्रवासीले आफ्नो घर फर्कन नपाएको कथामा आधारित चलचित्र ुभुठानु लाई विनोद पौडेलले निर्देशन गरेका हुन्। चलचित्रमा हरिवंश आचार्य,दयाहाङ राई,पुजा चन्द, ऋचा घिमिरे,अदिती प्याकुरेल,जोयश पाण्डे लगायत हलिउड कलाकार ब्रुस डर्नको पनि अभिनय रहेको छ ।