१६० देशसँग नेपालको व्यापार- १२८ सँग घाटामा

काठमाडौं । नेपालको व्यापार घाटा हरेक वर्ष बढ्दै गएको छ । एक वर्षको अवधिको मात्रै तुलना गरेर हेर्ने हो भने पनि नेपालको व्यापार घाटा चुलिँदै गएको देखिन्छ ।

भन्सार विभागका अनुसार चालु आर्थिक वर्ष २०८१/८२ को आठ महिनामा नेपालले ९ खर्ब ८७ अर्ब ३९ करोड रुपैयाँ बराबर व्यापार घाटा व्यहोरेको छ । जुन गत आवको सोही अवधिको तुलनामा ६.२२ प्रतिशतले बढी हो । गत आवको सो अवधिमा नेपालले ९ खर्ब २९ अर्ब ५२ करोड बराबरको व्यापार घाटा व्यहोरेको थियो ।

यस अवधिमा ११ खर्ब ४५ अर्ब ५६ करोड रुपैयाँ बराबरको वस्तुहरू आयात भएको छ । नेपालबाट एक खर्ब ५८ अर्ब १७ करोड रुपैयाँको मात्र वस्तुहरू निर्यात गर्न भएको छ ।

चालु आर्थिक वर्षको साउनदेखि फागुनसम्मको अवधिमा १३ खर्ब ३ अर्ब ७३ करोड रुपैयाँ बराबरको वैदेशिक व्यापार भएको छ । जुन व्यापार नेपालले १६० देशसँग गरेको हो । जसमा अधिकांश देशसँगको व्यापार घाटामा देखिन्छ । ३२ मुलुकसँगको  व्यापार मात्रै नाफामा छ ।

नाफामा रहेका मुलुकसँगको व्यापार पनि निराशाजनक नै छ । नाफामा देखिएको मुलुकसँग नेपालको व्यापार अत्यन्तै कम छ । यी मुलुकसँग बढीमा ६५ करोडसम्म व्यापार नाफा रहेको भन्सारको तथ्यांकमा देखिन्छ ।

भन्सार विभागका अनुसार ३७ देशबाट नेपालले वस्तु तथा सेवा आयात मात्रै गर्छ । यी देशहरूमा नेपालबाट हुने निर्यात ‘शून्य’ रहेको छ ।

नेपालको सबैभन्दा ठूलो व्यापार साझेदार मुलुक भारतसँग पनि नेपालको उच्च व्यापार घाटा छ । ठूलो परिमाणमा व्यापार हुँदै आएको भारतसँग ५ खर्ब ६३ अर्ब ६७ करोड रुपैयाँको व्यापार घाटा भएको छ । यो घाटा चालू आवको आठ महिनामा नेपालले व्यहोरेको हो ।

कुन देशसँग कस्तो छ व्यापार ?