जनमत र नाउपाबीच पार्टी एकताको अन्तिम गृहकार्य- सिके राउत अध्यक्ष, रेशम चौधरी संरक्षक

काठमाडौं । डा. सिके राउतले नेतृत्वको जनमत पार्टी र रेशम चौधरी संरक्षक रहेको नागरिक उन्मुक्ति पार्टी नागरिक उन्मुक्तिबीच पार्टी एकताको अन्तिम तयारी भएको छ। तराई मधेशको सबैभन्दा ठुलो दल बनाउने दुई पार्टी एकताको लागि सहमत भएका हुन्।

अहिले दुवै पार्टी एकताको लागि आन्तरिक तयारीमा केन्द्रित छन्। जनमतसँग एकताबारे निर्णय लिनको लागि नाउपाको केन्द्रीय समितिको बैठक हिजोदेखि जारी छ।

बैठकले जनमतसँग एकता गर्ने निर्णय र तयारीको लागि कार्यदल बनाउने जनाइएको छ। नाउपासँग एकता गर्ने मोटामोटी सहमति भइसकेको जनमतका प्रवक्ता डा। शरद यादवले बताए।

उनले भने, ‘हामी पार्टी एकता गर्न दुवैतिर सहमत भइसकेका छौं। उहाँ ९नाउपा०हरुले आज सकिने बैठकबाट कार्यदल बनाएपछि अन्तिम रुप दिइन्छ।’उनले दुई पार्टी सहमति भइसकेकाले अब चाँडै एकता प्रक्रियामा आउने बताए।

पार्टी एकतापछि जनमत पार्टीका अध्यक्ष राउतलाई अध्यक्ष मान्न नाउपा सहमत भइसकेको जनमतका एक नेताले बताए।
ती नेताले भने, ‘उहाँहरु बैठकमा छलफल भइरहेको होला। तर डाक्टर सावलाई अध्यक्ष बनाउने कुरामा रेशमजीहरु पनि सहमत हुनुहुन्छ। उहाँलाई संरक्षक र रञ्जिता श्रेष्ठलाई सहअध्यक्ष बनाउने कुरामा सहमति भइसकेको छ। अब औपचारिक रुपमा कार्यदलले सबै टुंग्याउँछ।’

जनमतले यसअघि नै नाउपासँग एकताको लागि उपाध्यक्ष अब्दुल खानको नेतृत्वमा कार्यदल बनाइसकेको छ। कार्यदलमा प्रवक्ता यादव र सचिव बालगोविन्द चौधरी सदस्य छन्।

यी दुई पार्टीबीच एकता भएपछि प्रतिनिधि सभामा १० सीटसहित छैटौँ ठुलो दल बन्नेछ। संसद्मा माधव नेपाल नेतृत्वको एकीकृत समाजवादीसँग पनि १० सीट नै छ।

तराइको सबैभन्दा ठुलो पार्टी जसपा थियो। जसपा विभाजन भइसकेको अवस्थामा नाउपा र जनमत एकता हुँदा तराइ मधेशको सबैभन्दा ठुलो पार्टी बन्नेछ।