राप्रपाको बैठक जारी, राजसंस्था फर्काउन आन्दोलनको खाका बनाउँदै

काठमाडौं । राष्ट्रिय प्रजातन्त्र पार्टीको आन्दोलन मुल आयोजक समितिको बैठक सुरु भएको छ । राजसंस्था पुनर्स्थापनाका लागि आन्दोलन कार्यक्रम तय गर्न धुम्बाराहीको एउटा पार्टी प्यालेसमा बैठक बसेको हो ।

राप्रपाको गत चैत ५ गतेको बैठकले राजसंस्था, हिन्दू राष्ट्र स्थापना र संघीयता खारेजीको एजेन्डासहित सडक आन्दोलनमा उत्रिने निर्णय गरेको थियो । आमुल आयोजक समितिका संयोजक समेत रहेका पार्टी अध्यक्ष राजेन्द्र लिङदेनको अध्यक्षतामा बैठक बसिरहेको प्रवक्ता मोहन श्रेष्ठले जानकारी दिए ।

बैठकमा राप्रपाका सबै शीर्ष नेताहरु उपस्थित छन् । पछिल्लो समय संस्थापनइतर समूहमा रहेका वरिष्ठ उपाध्यक्ष रविन्द्र मिश्र, वरिष्ठ नेताद्वय पशुपतिशम्शेर राणा र डा। प्रकाशचन्द्र लोहनी, महामन्त्री धवलशम्शेर राणाको पनि उपस्थित रहेको छ । उनीहरु नवराज सुबेदीले नेतृत्व गरेको समूहमा पनि छन् । राणा उक्त समूहले गठन गरेको आन्दोलन परिचालन समितिका संयोजक हुन् ।

राप्रपाको आन्दोलन मुल आयोजक समितिमा पार्टीका सबै केन्द्रीय सदस्य, सांसदहरु, प्रदेश तथा जिल्ला सभापतिहरु, भातृ संगठनका अध्यक्षहरु रहेका छन् । ५ गतेको कार्यसम्पादन समितिका अध्यक्ष लिङ्देनले आन्दोलनको बागडोर आफ्नो हातमा लिएका थिए ।