राप्रपाले भन्यो- कुलमानबारे उठेको विषय व्यक्तिगत होइन, प्रधानमन्त्रीले सदनबाट जवाफ दिनैपर्छ (भिडिओ)

काठमाडौं । राप्रपाका प्रमुख सचेतक ज्ञानेन्द्र शाहीले प्राधिकरणबाट कुलमान घिसिङलाई हटाउने निर्णयको स्पष्टीकरण प्रधानमन्त्री केपी ओलीले संसदमा आएर दिनुपर्ने बताएका छन् ।

संसद भवन परिसरमा सञ्चारकर्मीसँग कुरा गर्दै सदनमा उठिसकेपछि प्रधानमन्त्रीले आएर जवाफ दिनैपर्ने अडान सुनाए ।

उनले भने, ‘प्रधानमन्त्रीको कुर्सीमा बसेपछि देश र जनताको आवाजमा प्रधानमन्त्रीले जवाफ दिनैपर्छ। हामीले संविधान र संसदको नियमावलीमा स्पष्ट लेखेका छौं। सरकार संसदप्रति उत्तरदायी हुने भनेर, त्यो लेखिसकेपछि संसदमा उठेको प्रश्नको जवाफ प्रधानमन्त्रीले दिनुपर्छ । बाहिर गएर जवाफ दिने होइन । संसदको रोष्ट्रमबाटै दिनुपर्छ, हामीलाई चाहियो ।’

उनले सरकारले विद्युत प्राधिकरणको बक्यौता रकम नउठाउने षड्यन्त्र गरेर कुलमानलाई हटाएको आरोप लगाए ।

उनले थपे, ’यो कुनै कर्मचारीको कुरा होइन । विद्युत प्राधिकरणले उठाउनुपर्ने बक्यौता नठाउने षड्यन्त्र हुँदैछ । त्यसको विरोध गरेका हौं । कुलमान घिसिङले व्यापारीहरुलाई पैसा तिर भन्नुभएको थियो । व्यापारीहरुले पैसा नतिरेर के देखिन्छ। त्यसको पक्षमा सरकार उभिएको छ । त्यसैले यो कुनै व्यक्तिवादी बिषय होइन ।’