लुम्बिनीमा विद्या भण्डारी- विहार शिलान्यास र तीर्थस्थल घुमघाम, एमाले पंक्तिको दौडधूप धुमधाम

रुपन्देही । कोशी र गण्डकी प्रदेशको भ्रमणपछि पूर्वराष्ट्रपति विद्यादेवी भण्डारी तीन दिनको कार्यक्रम लिएर विहीबार रुपन्देही आइपुगेकी छन् । विहीबार बिहान काठमाडौंबाट भैरहवा ओर्लिएकी पूर्वराष्ट्रपति भण्डारी लुम्बिनी पुगेकी छन् ।

शुक्रबार लुम्बिनी विकास क्षेत्रमा निर्माण गरिने बिहारको शिलन्यास गर्ने र शनिबार यस क्षेत्रका महिला जनप्रतिनिधिसँगको अन्तरसंवाद भएपनि त्यसअघि र पछि उनले नेकपा एमालेको विभिन्न तहमा रहेका नेता-कार्यकर्ताहरूसँग भेटघाट सुरू गरेकी छन् । उनी तीन दिनसम्म रुपन्देही बस्ने कार्यक्रम रहेको छ ।

विशेषगरी भण्डारीको कोशी भ्रमणले एमाले वृत्तमा तरंग ल्याएको थियो भने राष्ट्रिय राजनीतिमा विद्यादेवी भण्डारी फेरि कार्यकारी भूमिकामा फर्किने चर्चाले आकार लिएको थियो ।

भण्डारी निवासमा त्यसपछि एमाले नेता कार्यकर्ताको चहलपहल झनै बढेको छ भने स्वयं अध्यक्ष तथा प्रधानमन्त्री केपी शर्मा ओली पनि पछिल्लो केन्द्रीय कमिटी बैठकपछि भण्डारी निवासमा छलफलका पुगेका थिए ।

अहिलेसम्म खुलेर एमालेको राजनीतिमा नदेखिए पनि उनले भित्रभित्र आफ्नो पक्षमा माहोल बनाइरहेको एमाले नेताहरूले नै सार्वजनिक गरिरहेका छन् । विशेषगरी विभिन्न कमिटी र जनसंगठनका नेतृत्वमा समेटिन नसकेका तथा पेलाइमा परेकाहरुले गुनासो बिसाउने चौतारी भण्डारी निवास बनेको छ ।

रुपन्देहीमा भण्डारीका अन्य कार्यक्रम तय भए पनि मुख्य उद्देश्य एमालेभित्र आफ्नो माहोल बनाउने रहेको आंकलन उनी निकटस्थहरूको छ । भण्डारीले भैरहवामा रहँदासम्म लुम्बिनी प्रदेशका विभिन्न जिल्लाका अध्यक्ष, यहाँका केन्द्रीय सदस्य, प्रभावशाली नेताहरू, युवा, विद्यार्थी र महिला संघका नेताहरूसँग छलफल गर्ने तय भएको छ ।

नेकपा एमालेका लुम्बिनी प्रदेश अध्यक्ष राधाकृष्ण कंडेलले तीन दिनको कार्यक्रम लिएर विद्यादेवी भण्डारी यहाँ आएको र आफूले पनि भेटेर फर्केको नेपाल प्रेसलाई बताए ।

कँडेलले भने, ‘मसहितका नेताहरू उहाँलाई विमानस्थलमा स्वागत गरेर लुम्बिनी भिलासासम्म आएर एकछिन कुराकानी गरेर फर्केका हौं, भोलि लुम्बिनीमा विहारको शुभारम्भ कार्यक्रम रहेछ, पर्सी महिला जनप्रतिनिधिसँगको अन्तरक्रिया रहेछ, सामान्य राजनीतिक अवस्थाका कुराकानी भए । उहाँ राजनीतिबाटै त्यहाँ जानुभएको हो, अरु कुरा हुने त सामान्य नै भयो तर बाहिर चर्चा आएजस्तो पार्टी नेतृत्वको, महाधिवेशनको विषयमा कुनै कुरा भएको होइन ।’

लुम्बिनीको कार्यक्रमअघि र पछि उनले भेटघाटलाई निरन्तरता दिएकी छन् । आन्तरिकरूपमा नेकपा एमाले नेता-कार्यकर्तासँग भेटघाट, लुम्बिनी र भैरहवामा हुने कार्यक्रममा सहभागिता जनाउने छन् । यो बीचमा उनले केही धार्मिक यात्रा गर्ने र भैरहवास्थित सिद्धार्थ भिलासामा बस्ने कार्यक्रम तय भएको एमाले नेताहरूकै भनाइ छ ।

विहीबार साँझ उनले बुटवलस्थित लुम्बिनी केबलकार भ्रमण तथा माँ कामाख्यादेवी मन्दिर दर्शन गर्ने र साँझ ८ देखि ९ बजेसम्म भैरहवास्थित भिलासामा भेटघाट गर्ने कार्यक्रम राखिएको छ ।

एमाले केन्द्रीय सचिव तथा लुम्बिनी प्रदेश इन्चार्ज पद्मा अर्यालले पूर्वराष्ट्रपति भण्डारीसहित आफू लुम्बिनीमा रहेको नेपाल प्रेसलाई बताइन् ।

‘पूर्वराष्ट्रपति भोलि लुम्बिनी विकास कोषभित्र बन्न लागेको विहारको शिलन्यास गर्न आउनुभएको हो, म उहाँसँगै छु’ उनले भनिन् ।

एमाले केन्द्रीय सदस्य तथा बुटवल उपमहानगरका उपमेयर सावित्रा अर्यालले पूर्वराष्ट्रपति भण्डारीलाई भैरहवामै भेटेर आफू बुटवल फर्केको बताइन् ।

‘उहाँ आउने पूर्वसूचना नै थियो, म भैरहवामै पुगेर भेटेर फर्केको हुँ, ’ उनले भनिन् ।

पूर्वराष्ट्रपति भण्डारीले पार्टीको नेतृत्वमा जानेगरी तयारी गरेको र अहिले त्यही अनुसार भेटघाट बढाएको विषय चर्चामा छ । तर, उनलाई भेटेका नेताहरूले यसबारे केही खुलाएका छैनन् ।

अहिले उनको भेटघाटमा सक्रियता देखाएका नेताहरूको अनुहारले पनि त्यसलाई प्रष्टाउँछ । उनलाई भेटेका धेरै नेताहरूले विषयलाई खुलाउन नचाहेपनि केही नेताहरूका अनुसार आन्तरिकरूपमा भण्डारी राजनीतिमा सक्रिय हुन चाहेको प्रष्ट बुझ्न सकिन्छ । उनीसँग पहिलेदेखि नै निकटस्थ नेताहरूले यो भेटलाई बलियो बनाउनेगरी योजना बनाएका छन् ।

पूर्वराष्ट्रपतिले तीन दिनसम्म एमालेका लुम्बिनी प्रदेशका विभिन्न तहका नेता-कार्यकर्ता भेटघाट गर्नेछिन् । दुई कार्यकाल मुलुकको सर्वोच्च निकाय राष्ट्रपति पद सम्हालेकी उनले जिल्ला दौडाहामा निस्किएर आफ्नो पुरानो राजनीतिक विरासत फर्काउन खोजेको भन्ने यो विषयले चर्चा पाउन थालेको छ ।

शुक्रबार उनी लुम्बिनीमा आयोजित एक कार्यक्रममा आधा घण्टा बिताउने छिन् । यसपछि २ बजेदेखि साढे तीन बजेसम्म भेटघाटमा व्यस्त हुनेछिन् । दिउँसो साढे ३ बजे उनी त्रिवेणी धाममा धार्मिक यात्राका लागि निस्किने छन् । त्यहाँबाट फर्किएपछि बेलुका ८ देखि १० बजेसम्म भेटघाटमा व्यस्त हुनेछन् ।

१६ गते शनिबार बिहान ११ बजेदेखि बेलुका साढे ६ बजेसम्म भैरहवामा हुने महिला नेतृहरुबीचको अन्तरसंवाद कार्यक्रममा सहभागी हुनेछन् ।

चैत १७ गते उनी काठमाडौं फर्किने कार्यक्रम छ । भण्डारी भैरहवा आउँदा उनलाई एयरपोर्टदेखि भैरहवास्थित होटल सिद्धार्थ भिलासासम्म ल्याउन एमाले नेता-कार्यकर्ताहरुको ठूलो पंक्ति पुगेको थियो ।

उनलाई भेट्न सिद्धार्थ भिलासामा एमाले पोलिटब्यूरो सदस्य एवं लुम्बिनी प्रदेशका पूर्वमुख्यमन्त्री लीला गिरी, केन्द्रीय सदस्य खिमलाल भट्टराई, लुम्बिनी प्रदेशका अध्यक्ष राधाकृष्ण कँडेल, प्रतिनिधिसभा सदस्य वासुदेव घिमिरे, जिल्ला अध्यक्ष यज्ञ गैरेसहितका नेताहरू पुगेका थिए । प्रतिनिधिसभा सदस्य रहेका वासुदेव घिमिरे भण्डारीसँगै काठमाडौंबाट आएका हुन् ।

पूर्वमन्त्री एवं एमाले सचिव पद्या अर्याल, पूर्वमन्त्री एवं प्रतिनिधिसभा सदस्य कृष्णगोपाल श्रेष्ठ भण्डारीसँगै छन् । यस्तै, बुटवल उपमहानगर उपप्रमुख सावित्रादेवी अर्याल, सिद्धार्थनगर उपप्रमुख उमा अधिकारी, एमाले जिल्ला उपाध्यक्ष हितराज पन्थी, अनेरास्ववियु, युवा संघ, पार्टीका गाउँ-नगर कमिटी अध्यक्ष तथा पदाधिकारी, अनेमसंघका नेतृहरूले भेटघाट गरिसकेका छन् ।

विश्लेषक तथा एमालेका युवा नेता दलबहादुर गुरुङ एमालेको पदाधिकारी रहेर राष्ट्रपति बनेको मान्छेले राजनीतिक भेटघाट गर्नु विषय सामान्य रहेको बताउँछन् ।

‘उहाँ राजनीतिक क्षेत्रबाटै सर्वोच्च पदमा जानुभएको हो, अहिले त्यहाँ हुनुहुन्न तर बाहिर बसेर राजनीतिको चिन्ता गर्ने विषयलाई ठूलो विषय बनाउनुपर्छ भन्ने मलाई लाग्दैन’ उनले भने ।