कमल थापाले भने- सरकारले दमन गर्यो, उत्तेजित भिडबाट भएको तोडफोड र आगजनी निन्दनीय

काठमाडौं । राप्रपा नेपालका अध्यक्ष कमल थापाले आज भएको राजावादी आन्दालनमा सरकारले दमन गरेको भन्दै भत्र्सना गरेका छन् ।

सरकारी दमनका कारण उत्तेजित भिडले विभिन्न स्थानमा गरेको तोडफोड र आगजनी पनि निन्दनीय रहेको उनको भनाइ छ ।

आजको आन्दोलनबारे कमल थापाले फेसबुकमा गरेको टिप्पणी जस्ताको तस्तैः

भ्रष्ट व्यवस्था र भ्रष्ट शासकबाट मुक्ति तथा हिन्दुराष्ट्र र राजसंस्था पुनःस्थापनाको निम्ति आज काठमाडौंमा भएको प्रदर्शनको क्रममा सरकारले गरेको दमनको राप्रपा नेपाल भत्सर्ना गर्दछ । प्रदर्शनको क्रममा भएका अप्रिय घटनाहरु खेदजनक छ ।

प्रहरीको गोली लागेर किर्तिपुरका युवा सविन महर्जनले सहादत प्राप्त गरेका छन् । तिनकुनेमा आगो लागेको भवनमा जलेर एभिन्यूज टेलिभिजनका फोटो पत्रकार सुरेश रजकको निधन भएको सुन्दा स्तव्ध भएको छु । यो घटनाको जति नै निन्दा गरे पनि कम हुन्छ ।

दिवंगत आत्माहरूको चीरशान्तिको कामना गर्दछु ।

दर्जनौं प्रदर्शनकारी र प्रहरीहरू घाईते भएका छन् । घाईतेहरुको शिघ्र स्वास्थ्यलाभको कामना गर्दछु । तिनकुनेमा निजी घरमा पसेर प्रहरीले जुलुसमा र सभा सुरु हुनु अगावै मञ्चमा अश्रुग्यास प्रहार गरेपछि परिस्थिति अराजक हुनपुगेको हो ।