ब्राजिलका प्रशिक्षक डोरिभल जुनियर बर्खास्त

हेटौंडा । ब्राजिलका राष्ट्रिय फुटबल प्रशिक्षक डोरिभल जुनियर बर्खास्तीमा परेका छन् । फिफा विश्वकप २०२६ अन्तर्गत दक्षिण अमेरिकी छनोटमा चिरप्रतिद्वन्द्वी अर्जेन्टिनासँग ४-१ ले पराजित भएपछि ब्राजिलले प्रशिक्षक जुनियरलाई बर्खास्त गरेको हो ।

फिफा विश्वकप छनोटमा ब्राजिलको प्रदर्शन उत्साहजनक नदेखिएपछि जुनियरलाई बर्खास्त गरिएको ब्राजिल फुटबल फेडेरेसनले जनाएको छ । ६२ वर्षीय जुनियर सन् २०२४ जनवरीदेखि राष्ट्रिय टोलीको प्रशिक्षकको जिम्मेवारीमा थिए ।

प्रशिक्षक जुनियरले आफ्नो प्रशिक्षणकालको १६ खेलमध्ये सात जित, ६ बराबरी र तीनमा हार व्यहोरे । ब्राजिलले छनोटका १४ मध्ये ५ खेल हारेपछि ब्राजिल दक्षिण अमेरिकी समूहमा चौथो स्थानमा छ ।

बर्खास्तीपछि फेडेरेसनले नयाँ प्रशिक्षकको खोजी सुरु भैसकेको जनाएको छ ।