प्रधानमन्त्रीले तीनकुने घटनाको मूल जिम्मेवार पूर्वराजा भनेपछि राप्रपाको कडा प्रतिवाद, संसदमा तनाव (भिडिओ)

काठमाडौं । प्रतिनिधिसभा बैठकमा प्रधानमन्त्री केपी शर्मा ओलीले बोल्दै गर्दा राप्रपा सांसदहरूले अवरोध गरेका छन् । प्रधानमन्त्रीले पूर्वराजा ज्ञानेन्द्र शाहको आलोचना गरेपछि राप्रपा सांसदहरू आक्रोशित बने ।

प्रधानमन्त्री केपी शर्मा ओलीले चैत १५ गते तीनकुनेमा भएको घटनामा पूर्वराजा साह मुख्य जिम्मेवार भएको बताएका थिए । लगत्तै राप्रपाका प्रमुख सचेतक ज्ञानेन्द्र शाहीले उठेर विरोध जनाए । त्यसपछि पार्टीका सबै सांसदहरू उठे ।

प्रधानमन्त्री ओलीले दुर्गा प्रसाईंलाई आफ्नै निवासमा बोलाएर पूर्वराजाले जनकमाण्डर तोकेको बताएपछि शाहीले प्रतिवाद गर्न खोजेका थिए ।

प्रधानमन्त्रीको भनाइ यस्तो थियोः

पूर्वराजा ज्ञानेन्द्र शाहले आफू अघि बढ्ने साथ देऊ भन्दै वक्तव्यवाजी गरेलगत्तै ठाउँ-ठाउँमा स्वागत कार्यक्रम गरेर जनमत भड्काउन खोजियो । फागुन २५ मा कथित स्वागत सवारी आयोजना गरियो । चैत १४ गते समाज बिथोल्न लागि परेका अवाञ्छित व्यक्तिलाई आफ्नै निवासमा डाकेर कथित जनकमाण्डर तोक्नुभयो र हिंसात्मक वारदातका लागि खटाउनुभयो ।

प्रारम्भिक अध्ययनमा सबै घटनाले स्पष्ट पार्छ पूवराजाले संविधानको ऐतिहासिक निर्णयपछि भएको सम्झौताको उल्लंघन गर्नुभएको छ । यतिबेला नागरिकको हैसियतमा उहाँले शान्त जीवन बिताउने, नागरिकको कानूनी र संवैधानिक अधिकार प्रयोग गर्ने तथा सरकारले सुरक्षाको प्रवन्ध गर्ने र उहाँलाई नागार्जुन दरवार र मातालाई नारायणहिटी प्रयोग गर्न दिने सहमति भएको थियो ।

म नियमावलीको होइन, संविधान व्यवस्था मास्ने कुरासँग प्रश्न उठाइरहेको छु । सबैले यो देशमा सबैले व्यवस्था र संविधान मान्नुपर्छ । हल्ला गरेको भरमा राजनीति, संसद सबै अवरोध गर्ने काम गर्न मिल्दैन ।

आपराधिक घटनामा संलग्न कसैले पनि उन्मुक्ति पाउनुहुन्न । पूर्वराजा शाहले पनि उन्मुक्ति पाउनुहुन्न । फेरि राजा बन्छु, व्यवस्था मास्छु भन्नेले यी सबै श्रृंखलावद्ध घटनामा आफ्ना धारणा सार्वजनिक गर्नुपर्दैन ? मानिसलाई मार्न दुरुत्साहित गर्ने, जनकमाण्डर बनाउने, आफू शासक लोभ राख्नेले यी सबै घटनाबारे बोल्नु पर्दैन ? मुल जिम्मेवार उहाँ हो । उहाँले जिम्मा लिनुपर्छ ।