समाजवादी मोर्चालाई प्रधानमन्त्रीले दिए धन्यवाद (भिडिओ)

काठमाडौं । प्रधानमन्त्री केपी शर्मा ओलीले समाजवादी मोर्चालाई धन्यवाद दिएका छन् । प्रतिनिधिसभाको बैठकमा बोल्दै चैत १५ गते काठमाडौंमा गणतन्त्रको पक्षमा भव्य सभा गरेको भन्दै धन्यवाद दिए ।

उनले भने, ‘यस सम्मानित सदनमा राम्रो उपस्थिति रहेका दलहरूको मूल नेतृत्वमा ‘सामाजवादी मोर्चा’ ले काठमाडौंको प्रदर्शनी मार्गमा भव्य सभा गर्‍यो । आफ्नो धारणा सार्वजनिक गर्‍यो । सरकारलाई खवरदारी गर्‍यो । संविधान र व्यवस्थाप्रति आफ्नो प्रतिबद्धता जनायो । शालीन जुलुससहित भएको त्यस कार्यक्रमका आयोजकहरूलाई धन्यवाद ज्ञापन गर्दछु । हाम्रो संघीय लोकतान्त्रिक गणतन्त्रलाई सुदृढ गर्ने विधि यस्तै हो भन्ने पनि म ठान्दछु ।’

ओलीले यसो भनिरहँदा प्रमुख विपक्षी माओवादीलगायत समाजवादी मोर्चामा आवद्ध दलका सांसदहरूले ढ्यापढ्याप पारेर आभार व्यक्त गरे ।