झलनाथको आरोप- मूर्ति बेचेर बाहिरबाट नेपालमा हेरोइन भित्र्याउने पहिलो व्यक्ति पूर्वराजा ज्ञानेन्द्र हुन् (भिडिओ)

काठमाडौं । नेकपा एकीकृत समाजवादीका सम्मानित नेता झलनाथ खनालले चिहानमा गाडेको राजतन्त्र ब्युँतिने कुनै सम्भावना नभएको बताएका छन् । पार्टी निकट खेलकुद महासंघले गरेको कार्यक्रमलाई सम्बोधन गर्दै उनले राजावादीहरूको चरित्र तीनकुने घटनाबाटै प्रस्ट भइसकेको बताए ।

उनले पूर्वराजा ज्ञानेन्द्र शाह मूर्तिचोर भएको दाबी गरे ।

नेता खनालले भने, ‘त्यति बेलाका अधिराजकुमारहरू ज्ञानेन्द्र, धीरेन्द्र नेपालको मूर्ति चोर्ने, बाहिर लाने, उनीहरूसँग डिप्लोमेटिक ब्याग हुन्थ्यो । डिप्लोमेटिक ब्यागमा खानतलासी हुँदैन, त्यो खानतलासी नहुने डिप्लोमेटिक ब्यागमा देशका अमूल्य चिजहरू बाहिर लाने र बाहिरबाट हेरोइन जस्ता चिजहरू ल्याउने काम गर्थे ।’

उनले नेपालको मूर्ति बेचेर नेपालमा सबैभन्दा पहिलो पटक हेरोइन भित्र्याउने मान्छे पूर्वराजा ज्ञानेन्द्र नै भएको आरोप लगाए ।