ट्रम्पको व्यापार युद्धका कारण युरोपलाई ‘स्वतन्त्रता’ तर्फ अगाडि बढाउनुपर्छ: ईसीबी प्रमुख

पेरिस । युरोपेली केन्द्रीय बैंक (ईसीबी)का अध्यक्ष क्रिस्टिन लागार्डले सोमबार अमेरिकी राष्ट्रपति डोनाल्ड ट्रम्पले नयाँ भन्सार महसुलको लहर ल्याउन तयारी गरिरहेको बेला युरोपले आर्थिक स्वतन्त्रतातर्फ अगाडि बढ्नुपर्ने बताएकी छन् ।

विश्वको सबैभन्दा ठूलो अर्थतन्त्रलाई ‘संसारका हरेक देशले लुटेको’ आरोप लगाउँदै ट्रम्पले बुधबार विभिन्न व्यापारिक साझेदारहरूमाथि पारस्परिक भन्सार महसुल लगाउने प्रतिज्ञा गरेका छन् । यसलाई उनले ‘मुक्ति दिवस’ भनेका छन् ।

लागार्डले फ्रान्स इन्टर रेडियोलाई युरोपले ‘अस्तित्वको क्षण’ को सामना गरिरहेको बताइन् ।

‘उहाँले यसलाई संयुक्त राज्य अमेरिकामा ‘मुक्ति दिवस’ भन्नुहुन्छ । मैले यसलाई एक यस्तो क्षणको रूपमा देख्छु, जुन बेला हामीले सामूहिक रूपमा हाम्रो भाग्यमाथि अधिक नियन्त्रण लिने निर्णय गर्नुपर्छ र मलाई लाग्छ यो स्वतन्त्रतातर्फको एक कदम हो’, युरोपेली सङ्घ (ईयू)ले अमेरिकी भन्सार महसुलको जवाफ तयार गरिरहेको बेला लागार्डले भनिन्, ‘प्रभावकारी रूपमा वार्ता गर्ने स्थितिमा आफूलाई राख्न हामी झुक्नेमात्र छैनौं भनेर हामीले देखाउनुपर्छ ।’

ईसीबीको अनुमानअनुसार ट्रम्पको व्यापार युद्धले पहिलो वर्षमै युरो क्षेत्रको अर्थतन्त्रलाई ०.३ प्रतिशतले घटाउन सक्छ र यदि युरोपेली सङ्घले प्रतिकार गरेमा ०.५ प्रतिशतले घट्नसक्छ ।

‘व्यापार युद्धले केवल हारहरूमात्र सिर्जना गर्छ’, लागार्डले भनिन् । -रासस/एएफपी