मध्यपश्चिम विश्वविद्यालयमा स्ववियु निर्वाचनको मतगणना जारी, नतिजा भोलि बिहान

सुर्खेत । मध्यपश्चिम विश्वविद्यालय (एमयू)मा सोमबार स्ववियु निर्वाचनको मतदान सम्पन्न भएको छ । मतदान बिहान ९:३० बजे सुरू भई बेलुका ५ बजे सकिएको छ।

सहायक मतदान अधिकृत, जगत ढकालका अनुसार कुल २८ सय ६४ मत खसेको छ।

विश्वविद्यालयमा ४ हजार ३ सय ८३ मतदाता रहेका थिए, जसमा ६५.३४ प्रतिशत मत खसेको छ। ३४.६६ प्रतिशत विद्यार्थी भने मतदानमा सहभागी भएनन्।

मतदान प्रक्रिया उत्साहजनक रहेको जनाउँदै ढकालले भने, ‘करीब ३४ प्रतिशत विद्यार्थी मतदानमा सहभागी भएनन्।

मतदान सकिएपछि ढकालले मत गणना प्रक्रिया सुरु भएको र आज बेलुकासम्म गणना पूरा हुने जानकारी दिए।

उनले भने, ‘संगठनसँग सहमति गरि गणना सुरु गरिसकेका छौँ । परिणाम भोलि बिहानसम्म उपलब्ध हुनेछ।’

छ वर्षपछि सम्पन्न भएको यस निर्वाचनमा, अध्यक्ष, सचिव र कोषाध्यक्षसहित १० प्रत्यक्ष र ९ समानुपातिक मतबाट गरी १९ जनाको कार्यसमिति चयन हुनेछ ।