भैरहवाबाट एकै पटक चार अन्तर्राष्ट्रिय विमान कम्पनीले रोके उडान, नेपाल एयरलाइन्सको सातामा एक उडान मात्रै

रुपन्देही । संस्कृति, पर्यटन तथा नागरिक उड्डयन मन्त्री बद्री पाण्डेले केही समय रुपन्देही आएर यहाँका व्यवसायीहरू समक्ष यहाँको गौतमबुद्ध अन्तर्राष्ट्रिय विमानस्थल पूर्णरुपमा सञ्चालन गर्न हरेक महिना दुई पटक यहाँ आएर बस्ने प्रतिबद्धता गरेका थिए । त्यसयता उनी हरेक पटक यहाँ आउँदा यही विषय दोहोराइरहेका छन् ।

एक साता अघि मात्रै उपप्रधान तथा अर्थमन्त्री विष्णुप्रसाद पौडेलले रुपन्देहीको भैरहवामा आयोजित एक कार्यक्रममा यहाँको गौतमबुद्ध अन्तर्राष्ट्रिय विमानस्थल पूर्णरुपमा सञ्चालन गर्ने बताए ।

उनले हिजो यहाँ विमानस्थल बन्दैन भन्नेहरू अहिले चल्दैन भन्ने स्टनबाजी गरेको भन्दै कडा विरोध गरेका थिए । उनी रुपन्देहीबाटै प्रतिनिधित्व गर्ने भएकाले र यसको सुरुवाती चरणबाटै अगुवाइ गरेकाले हरेक कार्यक्रममा यसलाई प्राथमिकता दिएर उठाउने गर्दछन् ।

नेताहरूले यसो भनिरहँदा यहाँ केही समययता नियमित अन्तर्राष्ट्रिय उडान गरेका चार अन्तर्राष्ट्रिय विमान कम्पनीहरूले भने उठान रोकेका छन् । पछिल्लो पटक कान्तिपुर दैनिकले भैरहवामा गरेको लुम्बिनीको सामर्थ्य विषयक कार्यक्रममा पनि उनीहरूले यस्तो विचार व्यक्त गरेका थिए ।

विमानस्थललाई पूर्ण क्षमतामा सञ्चालन गर्नुपर्ने माग गर्दै निरन्तर आन्दोलन गरिरहेका यहाँका व्यवसायीलाई अहिले उडान गर्दै आएका विमान कम्पनीहरूले समेत उडान स्थगित गरेपछि अर्को चिन्ता थपेको हो । कहाँबाट के चलखेल भइरहेको छ रुपन्देहीको विमानस्थल सञ्चालनमा अवरोधका लागि भन्ने संशय उनीहरूमा बढेको हो ।

भैरहवाबाट अन्तर्राष्ट्रिय उडान गरिरहेका जजिरा एयरवेज र फ्लाई दुबईले शनिवार यो सिजनको अन्तिम उडान गरेका छन् । अन्तिम उडान भरेर दुइवटै एयरलाइन्स भैरहवाबाट विदा मात्रै भएका छैनन् अब अर्को नियमित उडान कहिले हुन्छ कुनै निश्चित भएको छैन ।

अन्तिम उडानमा शनिवार जजिरा एयरवेजको उडानबाट १५६ जना भैरहवा आएका थिए । १६६ जना भैरहवाबाट कुवेत प्रस्थान गरेको विमानस्थलका सूचना अधिकारी विनोद सिंह रावतले जनाएका छन् । फ्लाई दुबईको जहाजबाट आएका ४२ जना भैरहवा झरेका थिए भने ३७ जना भैरहवाबाट दुबई प्रस्थान गरेका थिए । जहाजमा १०७ जना काठमाडौंका यात्रु थिए ।

गत कात्तिकदेखि जजिरा एयरवेजले भैरहवामा पुनः नियमित उडान थालेको थियो । त्यस्तै फ्लाई दुबई, थाइ एयर एशिया र कतार एयरवेजले पनि गौतम बुद्ध अन्तर्राष्ट्रिय विमानस्थलमा उडान सुरु गरेका थिए । कतारको उडान पुसबाट रोकिएको थियो । थाई एयर एशियाले यही चैत्र ११ गते सोमबारसम्म उडान गरेको थियो।

सातामा ३ पटक कुवेत भैरहवा कुवेत उडान गर्ने जजिरा र दुबई भैरहवा काठमाडौं दैनिक उडान गरेका फ्लाई दुबईले शनिवार यो विन्टर सिजनकै अन्तिम उडान गरेका हुन् ।

अप्रिलबाट अक्टोवरसम्म हुने समर सेड्युलको लागि उनीहरूले नागरिक उड्डयन प्राधिकरणसँग अनुमति लिएका छैनन् । त्यसैले अब उडान कहिले हुन्छ भन्ने टुंगो छैन । गौतम बुद्ध विमानस्थलको अन्तर्राष्ट्रिय कक्ष पनि पुनः सुनसान हुँदैछ ।

उद्घाटन भएको साढे २ वर्षपछि नियमित अन्तर्राष्ट्रिय उडान हुँदा रुपन्देहीमा उत्साह छाए पनि अहिले पुनः उडान रोकिँदा यहाँका व्यवसायीहरू चिन्तित बनेका छन् । विमान कम्पनीहरूले गौतमबुद्ध अन्तर्राष्ट्रिय विमानस्थलमा उडान गर्न यसअघि लिएको अनुमति मार्च ३१ अर्थात् चैत १८ गते सकिए पनि उनीहरूले नयाँ सेडेअलका लागि कुनै प्रक्रिया अघि नबढाएका हुन् । ग्रीष्मकालीन समयमा उडान गर्न विमान कम्पनीहरूले प्राधिकरणसँग पुनः अनुमति लिनुपर्ने हुन्छ । अनुमतिका लागि पुनः आवेदन नलिए विमान कम्पनीहरूले उडान गर्न पाउँदैनन् ।

अहिले उडान गर्दै आएका थाई एयर एसिया, जजिरा एयरवेज, फ्लाई दुबई र कतार एयरवेजले सोमबारदेखि गौतमबुद्ध अन्तर्राष्ट्रिय विमानस्थलमा उडान स्थगित गरेको विमानस्थलका सूचना अधिकारी विनोदसिंह रावतले बताए । ‘नयाँ सेडुअल नै नलिएपछि अहिलेलाई रोकियो, माथि कुरा भएको सुनेको छु, केही दिनअघि विभागीय मन्त्रीज्यू तथा अन्य मन्त्रीज्यूहरू पनि आउनुभएको थियो, सबै विषयमा हामीले जानकारी गराएका छौँ, खै किन रोकेको हो भन्ने विषयमा यहाँ हामीलाई केही जानकारी छैन तर नयाँ कुनै सेडुअल नआएपछि आजबाट चारवटै कम्पनीको उडान रोकियो’ उनले भने ।

जाडोयाममा हुस्सु तथा कुहिरोको बहाना देखाउँदै उडान गर्न नचाहेका विमान कम्पनीहरूले ग्रीष्मकालीन मौसममा समेत भैरहवाको उडान स्थगित गरी काठमाडौं केन्द्रित हुन लागेको नेपाल नागरिक उड्डयन प्राधिकरणले जनाएको छ ।
यहाँबाट फ्लाई दुबईले दुबई–भैरहवा–काठमाडौं–दुबई दैनिक एक उडान गर्दै आएको थियो भने जजिरा एअरवेजले साताको तीन दिन कुवेत–भैरहवा उडान गर्दै आएको थियो ।

त्यस्तै थाई एअर एसियाले सातामा एक पटक बैंकक–भैरहवा उडान गर्दै आएको थियो । कतार एयरले भने केही समययता भैरहवाको उडान बन्द गरेको थियो । त्यस्तै नेपाल एअरलाइन्सले पनि साताको चार दिन काठमाडौं–भैरहवा–दुबई उडान गर्दै आएको छ । सूचना अधिकारी रावतका अनुसार अब नेपाल एयरलायन्सको सातामा एक उडान मात्रै मलेसियाबाट भैरहवा हुँदै काठमाडौँ जाने मात्र रहने छ ।

यसअघि जाडोयाममा बाक्लो हुस्सु तथा कुहिरोले उडानमा समस्या आएको भन्दै विमान कम्पनीहरूले मंसिर अन्तिम सातादेखि भैरहवाको उडान स्थगित गरेका थिए। मौसममा सुधार आएपछि र हुस्सु तथा तुवाँलो लागेको समयमा समेत सुरक्षित अवतरण गराउन सकिने स्याटेलाइटमा आधारित आरएनपी–एआर प्रणाली लागू गरेपछि माघको दोस्रो सातादेखि पुनः उडान सुरू गरेका थिए । तर, अहिले चार वटै विमान कम्पनीहरूले भैरहवाको उडान स्थगित गरी काठमाडौं केन्द्रित हुन लागेपछि यहाँ उत्साहित व्यवसायीलाई निराश बनाएको हो ।

ग्रीष्मकालीन मौसममा भैरहवामा उडान नगर्ने विमान कम्पनीले स्पष्ट पारिसकेका छन् । अहिले भैरहवामा उडान गर्दै आएका कतार एयरवेज, थाई एयर एसिया, फ्लाई दुबई र जजिरा एयरवेजले भैरहवाको उडान स्थगित गरेर काठमाडौंमा उडान गर्न स्वीकृत लिइसकेका छन् ।

विमान कम्पनीहरूले कार्गो र पर्याप्त यात्रु नभएको भन्दै गर्मी सिजनमा उडान नगर्ने जनाएका हुन् । विमान कम्पनीहरूले पर्याप्त यात्रु नभएको बताइरहँदा गौतमबुद्ध अन्तर्राष्ट्रिय विमानस्थलको तथ्यांकले भने यात्रुहरूको संख्या वृद्धि हुँदै गएको देखिएको छ ।

विमानस्थलका महाप्रबन्धक प्रतापबाबु तिवारीका अनुसार गत जनवरीदेखि मार्च २० गतेसम्म १३ हजार १ सय ८१ यात्रुले भैरहवाबाट उडान तथा अवतरण गरेका छन् । सन् २०२४ मा ८ हजार १ सय ५७ यात्रुले भैरहवाबाट अन्तर्राष्ट्रिय उडान तथा अवतरण गरेकोमा सन् २०२५ को जनवरीदेखि मार्च २० सम्म मात्र १३ हजार १ सय ८१ यात्रुले उडान तथा अवतरण गरेका छन् ।

तिवारीका अनुसार मार्च महिनाको २० दिनमा पनि ५ हजार ३७ यात्रुले गौतमबुद्ध अन्तर्राष्ट्रिय विमानस्थलबाट सेवा लिएका छन् । जहाजहरूको उडान र अवतरणका लागि कुनै पनि समस्या नभएको र यात्रुहरूको संख्या समेत थपिँदै गएको अवस्थामा अन्तर्राष्ट्रिय उडान नै स्थगित भएपछि चुनौती थपिएको हो ।