नेपाल बोर्ड अफ ट्रष्टी रहेको एआइटी चरम संकटमा, एक लाख डलर सहयोग गर्ने सरकारको निर्णय

काठमाडौं । नेपाल समेत बोर्ड अफ ट्रष्टी रहेको विश्वकै प्रख्यात एसियन इन्स्टिच्युट अफ टेक्नोलोजी (एआइटी) चरम आर्थिक संकटमा फसेको छ । थाइल्याण्डमा रहेको एआइटीमा नेपालबाट वर्षौँदेखि धेरैले अध्ययन गरेका छन् ।

नेपाल समेत संस्थापक रहेका एआइटीलाई सरकारले एक लाख डलर आर्थिक सहयोग गर्ने निर्णय गरेको छ । मन्त्रिपरिषद्को सोमवार राति बसेको बैठकले एक लाख डलर सहयोग दिने निर्णय गरेको सरकारका प्रवक्ता पृथ्वीसुब्बा गुरुङले जानकारी दिए ।

बिमस्टेक बैठकमा सहभागी हुन आजै थाइल्याण्ड जान लागेका प्रधानमन्त्रीले एआइटीमा आयोजित कार्यक्रमलाई समेत सम्बोधन गर्ने तालिका छ । सन् १९५९ मा स्थापित एआइटीको संस्थापकमा नेपालसहित अन्य देश समेत छन् ।

यो इन्जिनियरिङ,एडभान्स टेक्नोलोजी, दिगो विकास र व्यवस्थापनलगायत विषयमा अध्ययन गराउने अन्तर्राष्ट्रिय शैक्षिक प्रतिष्ठान हो । यस प्रतिष्ठानबाट नेपालमा धेरै इन्जिनियरहरू उत्पादन भएका छन् ।