अमेरिकी संविधानमा छैन तर तेस्रो कार्यकाल पनि राष्ट्रपति बन्न ट्रम्प तयार

काठमाडौं । अमेरिकाको संविधानमा कुनै पनि राष्ट्रपतिले तेस्रो कार्यकाल राष्ट्रपति बन्ने प्रावधान निषेध गरिएको छ । तर, वर्तमान अमेरिकी राष्ट्रपति डोनाल्ड ट्रम्प भने सन २०२८ को चुनावमा पनि जान तयार भएका छन् । यो कुरा उनले सार्वजनिक रूपमै भनेका छन् ।

अमेरिकी समाचार एजेन्सी एपीका अनुसार सन २०२९ को जनवरीमा कार्यकाल सकिने ट्रम्पले सन २०२८ मा हुने आगामी राष्ट्रपति चुनावमा लड्न तयार भएको कुरामा आफू गम्भीर भएको बताएका छन् ।

अमेरिकी च्यानल एनबीसीसँग टेलिफोन संवाद गरेका ट्रम्पले फ्लोरिडामा रहेको आफ्नो नीजि क्लब मार आ लागोबाट भनेका थिए, ‘मैले तेस्रो कार्यकाल काम गर्नेबारेमा कुनै चुट्किला भनेको होइन ।’

आफू यो विषयमा ‘गम्भीर’ भएको ट्रम्पले बताएका छन् । सन २०१६ को चुनावमा पूर्व विदेशमन्त्री, पूर्वप्रथम महिला उम्मेदवार हिलरी क्लिन्टनलाई हराएका ट्रम्प सन २०२० मा पूर्वउपराष्ट्रपति पुरुष उम्मेदवार जो बाइडेनसँग पराजित भएका थिए ।

गत वर्ष (सन २०२४)को चुनावमा ट्रम्पले महिला उम्मेदवार तथा तत्कालीन उपराष्ट्रपति कमला ह्यारिसलाई पराजित गरेर दोस्रो कार्यकाल राष्ट्रपति भएका थिए ।

अमेरिकी संविधानको २२ औँ संशोधन सन १९५१ मा भएको थियो फ्राङ्लिन रुजबेल्टले लगालग चार कार्यकाल जितेपछि दुई कार्यकालको समय सीमा तोकिएको थियो ।