राजीनामा दिएका वनमन्त्रीको अडियोमा आफूलाई मुछेर अतिरञ्जित गरेको एमाले नेता रानाको गुनासो

कैलाली । सुदूरपश्चिम प्रदेशका उद्योग, पर्यटन, वन तथा वातावरण मन्त्री लक्ष्मणकिशोर चौधरीको आर्थिक चलखेलसम्बन्धी विवादित अडियो सार्वजनिक भएपछि राजीनामा दिएका छन् ।

एमाले नेता नारदमुनि राणासँग छलफल गरेको विषयमा आएको अडियोबारे मन्त्री र एमाले नेता रानाले दुवैले आफूहरुलाई नियोजित ढंगले फसाउन खोजिएको बताएका छन् ।

‘मैले समासायिक विषयमा कुरा गरिरहेको थिए । लेनदेनको कुनै कुरा भएको छैन’, आज पत्रकार सम्मेलनमा रानाले भने, ‘मेरो नाम जोडेर अतिरञ्जित गरियो ।’

मन्त्री चौधरीले दीगो वन व्यवस्थापन सम्बन्धी कार्यविधि आर्थिक लाभ लिनेगरि बनाउनेबारे छलफल गरेको अडियो गत साता सार्वजनिक भएको थियो । तर उक्त अडियो गत भदौतिरको भएको चौधरीले बताएका थिए ।

उक्त अडियोमा रानाले नै मन्त्री चौधरीलाई दीगो व्यवस्थापनसम्बन्धी कार्यविधि बनाउन, त्यसमा काम गर्ने तरिका पनि सिकाएका छन् । उनले अघिल्लो शुक्रबार नै कार्यविधि बनाएर कार्यदलमार्फत् शनिबारको बैठकमा पास गर्न पनि सिकाएको अडियोमा सुनिन्छ ।

मन्त्री चौधरीलाई नेता रानाले लुम्बिनीको दीगो वन व्यवस्थापनसम्बन्धी कार्यविधि हेरेर कैलालीको पनि बनाउन अडियोमा भनिरहेको सुन्न सकिन्छ । तर, मन्त्री चौधरीले, ‘कैलालीको होइन, सुदूरपश्चिमको भनेर’ रानालाई सच्याउन लगाउँछन् ।

सरकार प्रभावकारी बनाउने र कार्यविधि बनाउन कार्यदल बनाउने सम्मको सुझाव दिएको रानाले बताए। तर आर्थिक लेनदेनको कुनै कुरा नभएको रानाको दाबी छ ।

‘मलाई पूर्वमन्त्री भएको नाताले तपाईसँग कुरा गर्नु छ, चेम्बरमा आउनुस् भन्नुभयो’, उनले भने, ‘उहाँलाई मैले के हो सहयोग गर्दिनुपर्ने भन्दा उहाँले तपाईंसँग पुरानो डकुमेन्ट केही छ भन्नु भयो । मैले छैन भनेँ । अनलाइनमा खोज्दा लुम्बिनीको भेटियो । मैले त्यो कपी-पेस्ट गरेर हाल्दा भइहाल्यो नि भनेँ । त्यहाँ पैसको कुनै कुरा भएको छैन । त्यो सरासर गलत कुरा हो ।’

यसअघि कैलाली र कञ्चनपुर ६५ सामुदायिकलाई वैज्ञानिक वनमा लैजान खोजिएको थियो । प्रदेशले अब तीसहितका सामुदायिक वनलाई दीगो वन व्यवस्थापनमा लैजाने तयारी गर्दैछ ।

आर्थिक लेनदेनको अडियो सार्वजनिक भएपछि राजिनामा दिएका मन्त्री किशोर चौधरीले आफ्नु राजनीति सिध्याउने बद्नियतले अडियो रेकर्ड गरिएको बताएका छन् ।

आफु संगै हिड्ने केहि साथिहरुले अनावश्यक दवाव शिर्जना गरि वार्गेनिङ गर्न नियोजित रुपमा अडियो रेकर्ड गरिएको उनको दाबी छ ।

उनले भने ’अडियोमा भएको कुरा काटछाट गरेर गलत अर्थ लाग्ने गरि सार्वजनिक गरेको हो ।’

अडियो रेकर्ड गर्ने समुहले आफुलाई पटक पनि पटक त्यसका क्लीप सुनाउदै व्ल्याकमेल गर्न खोजेको चोधरीको आरोप छ । उनका अनुसार अडियोका क्लीप सुनाउदैँ जर्वजस्ति पर्यटन सम्बन्धिका नियुक्ती माग्न खोजिएको थियो ।

आफु जनताको हित र बिधि अनुसार चल्ने भएकाले उनिहरुको कुरा नमानेको बताए । त्यसैको झोकमा काटछाट अडियो सार्वजनिक गरि आफुलाई बद्धनाम गराएको उनको भनाइ छ ।

उनले आफूलाई नियुक्तिको विषयमा केही दिन अघि धम्की दिएको र सुरक्षित राखिएको धम्कीपूर्ण मेसेज आवश्यक परेको बेला सार्वजनिक गर्ने समेत बताएका छन् ।

अडियो सार्वजनिक भएपछि नागरिक उन्मुक्ति पार्टीले पनि छानविन सुरु गरेको छ ।