मदन भण्डारी राजमार्गमा रुख कटानको अनुमति

विराटनगर । वन क्षेत्रको रुख कटान हुन नसक्दा अलपत्र परेको मदन भण्डारी राजमार्ग निर्माणको काम शुरु हुने भएको छ । वन क्षेत्रमा पर्ने इलाम झापा, मोरङ र सुनसरी राजमार्गमा पर्ने रुख कटान हुन नसक्दा बाटो निर्माणको काम रोकिएको थियो ।

वन क्षेत्रबाहेक अन्यत्रको निर्माण सम्पन्न भएपनि वन क्षेत्रमा भने सडक निर्माणको काम हुन सकेको थिए । चैत ११ गते बसेको मन्त्रिपरिषदको बैठकले राजमार्गको जग्गा भोगाधिकार गर्ने निर्णय गरेको छ । निर्णयसँगै इलाम, झापा, मोरङ्ग र सुनसरी खण्डमा पर्ने १३ हजारभन्दा बढी रूख कटानको प्रक्रिया अघि बढेको छ ।

मन्त्रिपरिषद्को बैठकले झापाको बाहुनडाँगीदेखि सुनसरीको धरानसम्मको ७७ किलोमिटर भित्र पर्ने बन क्षेत्रको भोगाधिकार दिने निर्णय गरेको छ ।

निर्णय भएसँगै डिभिजन वन कार्यालयबाट अनुमति लिएर रूख कटानको कार्य भइरहेको मदन भण्डारी राजमार्ग योजना कार्यालय दमकका सूचना अधिकारी सुभाषकुमार दत्तले बताए । मन्त्री परिषदले भोगाधिकारको निर्णय गरेसँगै झापा र इलाममा छ हजार १ सय ७१, सुनसरीमा पाँच हजार ५ सय र मोरङमा दुई हजार १ सय ६३ रूख कटान हुने छन् ।

कार्यालयले झापाको पश्चिम खण्डमा पर्ने मावा खोलादेखि दमकको बेलडाँगीसम्मको ४७ रूख कटान गरिसकेको छ । यस्तै मावा खोलादेखि मोरङको केराबारीसम्मका दुई हजार १ सय ६३ रूख कटान कार्य जारी रहेको दत्तले जानकारी दिए ।

वन कार्यालयसँग रूख कटानको स्वीकृति लिएर धमाधम रूख कटान कार्य अघि बढिरहेको उनले बताए । झापा र इलामको सीमावर्ती क्षेत्र हुँदै सुखानीदेखि बाहुनडाँगीको पाटापुरसम्मको ३१ किलोमिटर र सुनसरी–मोरङ क्षेत्रको ४६ किलोमिटर राजमार्ग क्षेत्रमा सडक निर्माणको काम रोकिएको थियो ।

मोरङको वन क्षेत्रभित्रका रूख आगामी वैशाखभित्र कटान गरिसक्ने गरी काम भइरहेको कार्यालयका सूचना अधिकारी दत्तले बताए ।

धरानदेखि मधुमल्लासम्मको सडकमा पर्ने वन क्षेत्रका सात हजार ६ सय १० रूख हाल कटान भइरहेका र केराबारीदेखि मावा खोलासम्मको सडकखण्ड अन्तर्गतका दुई हजार १६३ रूख कटानको आदेश कार्यान्वयनको प्रक्रियामा रहेको थियो ।

सुनसरीमा पाँच हजार ५०० रूखमा छपान तथा टाँचा लगाउने कार्य सम्पन्न भइसकेको र कटान आदेश कार्यान्वयनको प्रक्रियामा शुरु भएको छ । यो राजमार्ग पूर्वको झापादेखि पश्चिमको डडेल्धुरा जिल्ला जोड्ने छ र चुरे महाभारत क्षेत्रमा निर्माणाधीन छ ।

मदन भण्डारी राजमार्गको कुल लम्बाई १,२०० किलोमिटर रहेको छ। धरानदेखि हेटौँडासम्मको ३०० किलोमिटर सडक निर्माण सम्पन्न भइसकेको छ।