दिपकको प्रारब्धः ईसाराले भोट मागेर चुनाव जिते, छोरी गुमाएको डेढ महिनामै बिते

रुपन्देही । छोरी गुमाएको ४७ दिनमा राप्रपाका वरिष्ठ नेता तथा प्रतिनिधिसभा सदस्य दिपक बोहराको मंगलबार निधन भएको छ । त्यसअघिबाटै दिपक बोहराले मृत्युसँग संघर्ष गरिरहेका थिए । रुपन्देही-३ बाट प्रत्यक्ष सांसद लडेका पूर्वमन्त्रीसमेत रहेका दिपकको घाँटीमा चुनावताका गम्भीर समस्या थियो । त्यसयता उनी लगातार उपचारमा थिए ।

गएको फागुन २ गते उनकी छोरी चाँदनी जेनी बोहराका ४६ वर्षको उमेरमा हृदयघातबाट काठमाडौंमा निधन भएको थियो । दिपककी एकमात्र छोरी चाँदनी जेनी बोहरा ग्यारेटको ४६ वर्षको उमेरमा हृदयघातका कारण मृत्यु भएको हो । अमेरिकन नागरिकसँग बिहे गरेकी जेनीका दुई छोरी र एक छोरा छन् । दिपकको रुपन्देही घर भएपनि अहिले काठमाडौंमै बसेका थिए ।

दिपकको स्वास्थ्य कमजोर बन्दै गएपछि छोरी जेनी पनि श्रीमान र बच्चाबच्चीसहित काठमाडौं बालुबाटारस्थित घरमा बसेको बेला एक्कासी बिरामी परेर मृत्यु भएको थियो । उनको काठमाडौंमा अन्त्येष्टि गरिएको थियो । छोरीको मृत्यु भएको ४७ दिनमा मंगलबार दिपकको पनि मृत्यु भएको हो ।

घाँटीमा क्यान्सर भएपछि प्रतिनिधिसभा निर्वाचनअन्तर्गत रुपन्देही-३ बाट निर्वाचित राप्रपाका दिपक बोहरा चुनाव प्रचार प्रसारभर ‘भ्वाइस रेस्ट’मा थिए । तर, उनले टिकट मागे र पार्टीले पनि पत्यायो । संयोग नेकपा एमालेको बलियो क्षेत्र रहेको ठाउँमा गठबन्धनका कारण एमालेले उनलाई साथ दियो ।

एकपटक नबोली निर्वाचन जिते, सदनमा पनि सम्बोधन नगरी बोहरा अस्ताए । सामान्यतया निर्वाचनमा उम्मेदवारहरू मतदाताको घरदैलोमा पुगेर आफ्नो लागि मत माग्ने गर्दछन् । तर, आम निर्वाचन २०७९ मा एकजना यस्ता उम्मेदवार बने जो बोल्दै नबोली विजयी भए । उनले बहालवाला गृहमन्त्री कांग्रेस नेता बालकृष्ण खाणलाई पराजित गरेर झन् चर्चामा आएका थिए ।

घरदैलोका क्रममा घरदैलो गरेपनि बोहराले मतदातासँग दोहोरो कुराकानी गरेनन् । उनले इसाराले नै मत मागे । उनको चुनावी सभामा निरञ्जन थापा, राप्रपाका जिल्ला अध्यक्ष प्रदीप उदय, स्वाति थापा, केन्द्रीय सदस्य तोयनाथ लम्साल, सागरप्रताप राणालगायतले सम्बोधन गर्दथे र उनले छेऊमा बसेर सुनेजस्तै गर्दथे ।

निर्वाचन आउनु ६ महिनादेखि बोहरा बोल्न छाडेका हुन् । पोस्टकोभिडका कारण समस्या देखिएपछि उनी चिकित्सकको सल्लाहमा ‘भ्वाइस रेस्ट’ मा बसेको भनिए पनि उनलाई क्यान्सर लागेको थियो । उनी पटक-पटक उपचारका लागि देशबाहिर गइरहेका थिए ।

दिपककी दुई श्रीमती, दुई छोरा र एक छोरी हुन् । जेठी श्रीमती मन्जुतर्फबाट गौरव बोहरा पाइलट छन् र कान्छी श्रीमती उन्नतितर्फ छोरा प्रज्वल व्यापारसँगै अहिले राजनीतिमा जोडिएका छन् । बुवा बिरामी भएपछि राप्रपाका कार्यक्रममा उनी सकृय हुन थालेका थिए । प्रज्वललाई दिपकको क्षेत्रमा अघि सार्नेगरी नै परिवारले यसअघि तयारी गरिसकेको छ ।