भक्तपुरमै पहिलो पल्ट वर्कहब को-वर्किङ स्पेश सुरु

भक्तपुर । भक्तपुरमै पहिलोपल्ट सूर्यविनायक नगरपालिका- ५ सल्लाघारीमा निजी अफिस, बैठक तथा भेटघाट र सामूहिक काम गर्न मिल्ने वर्कहब को-वर्किङ स्पेश सुरु गरिएको छ ।

अरनिको राजमार्गसँगै रहेको सल्लाघारीस्थित त्वानाबासू हाउसमा उक्त वर्कहब सुरु गरिएको हो । अफिस सञ्चालन, बैठक तथा निजी भेटघाट र सामूहिक कार्य गर्न दैनिक, साप्ताहिक, मासिक वा वार्षिक रुपमा वर्कहब भाडामा लिन सकिने सञ्चालक अशोक त्वानाबासूले जानकारी दिए ।

भक्तपुरमा नयाँ सेवा दिन आफूहरुले वर्कहब सुरु गरिएको उनले बताए । वर्कहबमा सुविधायुक्त फर्निचरसँगै इन्टरनेट, बिजुली, प्रिन्टिङलगायतको व्यवस्था गरिएको छ ।

‘महँगो भाडा तिरेर स्थायी कार्यालय व्यवस्थापन गर्न नसक्नेहरुलाई लक्षित गरेर वर्कहब सुरु गरेका हौं’, उनले भने, ‘हामीकहाँ एकल र समूह तथा मिटिङ गरी तीन किसिमका सेवा उपलब्ध छन् ।’

उनका अनुसार एकल सेवाको लागि ३ वटा क्याबिनको व्यवस्था छ । त्यस्तै ४-४ जनाले काम गर्न मिल्ने टेबलमा २८ जनासम्मले समूह कार्य गर्न सक्छन् । १० जनासम्मको क्षमताको छुट्टै बैठक कोठाको व्यवस्था रहेको उनले बताए । सञ्चालक त्वानाबासू ग्राहककाे मागअनुसार आपसी समन्वयमा थप सुविधा उपलब्ध गराउन सकिने बताउँछन् ।

सञ्चालक त्वानाबासूले कार्यालयमा लकरको समेत व्यवस्था रहेको बताए । काम गर्दागर्दा थाकेको महसुस भए रिफ्रेस हुन टेबलटेनिस तथा चिया कफी खाने रुफटपको व्यवस्था रहेको उनले जानकारी दिए ।

वर्कहबमा इन्टरनेटसँगै बिजुलीको लागि ब्याकअपको समेत व्यवस्था भएको उनले बताए । उनका अनुसार सेवा सुरु गरिएको अवसरमा दैनिक, साप्ताहिक र मासिक शुल्कमा २० प्रतिशतसम्म छुटको व्यवस्था गरिएको छ ।