अस्पतालको मूलगेटमा बन्दको प्रचार, भित्र बिरामी भर्ना गरेर उपचार !

जनकपुरधाम । जनकपुरधामको थापा चोकमा सञ्चालित जनकपुर सीता अस्पतालको मूलद्वारमा लेखिएको छ, ‘यो हस्पिटल अनिश्चितकालको लागि बन्द गरिएको छ ।’ तर, भित्र भने बिरामीको उपचार भइरहेको छ ।

माघ २६ मा मुख्यमन्त्री सतिशकुमार सिंह उक्त अस्पताल अनुगमन गर्दा सञ्चालकले दर्ताको प्रमाण देखाउन सकेका थिएनन् । अवैध रहेको भेटिएपछि अस्पताल बन्द गर्न मुख्यमन्त्री सिंहले निर्देशन दिए । तर, निर्देशन अटेर गरेको सूचना पाएपछि मुख्यमन्त्री सिंह सोमबार पुन: जाँदा बाहिर बन्दको सूचना टाँसेको भित्र सञ्चालनमा रहेको पाइयो ।

भित्र ५ जना बिरामी भर्ना गरेका थिए । अस्पतालमा चिकित्सक भने कोही थिएनन् । अस्पतालका म्यानेजर मधु महतो र रेखदेख गर्ने कर्मचारी सुभाष मुखियालाई प्रहरीले नियन्त्रणमा लिएको छ । स्रोतका अनुसार मुखिया बिरामी ल्याउने बिचौलियाको काम गर्छन् ।

मुख्यमन्त्री सिंहले भर्ना भएका बिरामीलाई अनुमतिप्राप्त स्वास्थ्य संस्थामा उपचारको प्रबन्ध मिलाउने जानकारी दिए ।

उनले भने, ‘अस्पताल संचालकहरू कोही सम्पर्कमा छैनन् । तर, पनि हामी बिरामीको भरपर्दो अस्पतालमा उपचारको व्यवस्था मिलाउँछौं ।’

अहिलेसम्म मुख्यमन्त्री सिंहले १६२ निजी स्वास्थ्य संस्थाको अनुगमन गरेका छन् । दर्ताविनाका ११२ वटा बन्द गराइएको छ ।