मार्चमा आए एक लाख २१ हजार पर्यटक, गत वर्षभन्दा घट्यो संख्या  

काठमाडौं ।  सन् २०२५ को मार्च महिनामा एक लाख २१ हजार भन्दा बढी पर्यटकले नेपाल भ्रमण गरेका छन् । पर्यटन बोर्डका अनुसार यस महिना एक लाख २१ हजार ६८७ पर्यटक नेपाल भित्रिएका हुन् ।

पर्यटक भित्रिएको यो संख्या गत वर्षको सोही अवधिको तुलनामा कम हो । सन् २०२४ को मार्चमा एक लाख २८ हजार १६७ पर्यटक नेपाल भित्रिएका थिए । त्यस्तै, पर्यटक आगमनको यस्तो संख्या सन् २०२३ को मार्चमा ९९ हजार ४२६ रहेको थियो भने सन् २०२२ को फेब्रुअरीमा ४५ हजार १५२ जना आएका थिए ।

सन् २०२५ को मार्चमा सबैभन्दा बढी भारतीय पर्यटक नेपाल आएका छन् । यस महिना भारतबाट २१ हजार ४१२ जना नेपाल भ्रमणका लागि आएका हुन् । यस अवधिमा अमेरिकाबाट ११ हजार ४४३ जना  आएका छन् भने चीनबाट ११ हजार ९२ जना पर्यटकले नेपाल भ्रमण गरेको पर्यटन बोर्डले जनाएको छ ।

त्यस्तै, यस अवधिमा थाइल्याण्डबाट ४ हजार ९८६ जना आउँदा बेलायतबाट ५ हजार ९९५ जना पर्यटकले नेपाल भ्रमण गरेका छन् । यस्तै, बंगलादेशबाट ३ हजार ५७६ जना पर्यटक नेपाल आउँदा श्रीलंकाबाट ८ हजार ८८६ र अष्ट्रेलियाबाट ४ हजार २२८ जना पर्यटक आएका छन् ।

यस महिना म्यानमारबाट ३ हजार ७५४ पर्यटकले नेपाल भ्रमण गरेको पर्यटन बोर्डले जनाएको छ ।