गण्डकीका मन्त्री थापाले तलब भत्तामार्फत आएको ७९ लाख सामाजिक सेवामा खर्चिए

पोखरा । गण्डकी प्रदेश सरकारका सामाजिक विकास, युवा तथा खेलकुद मन्त्री विन्दुकुमार थापाले तलब भत्तामार्फत आएको रकम सामाजिक काममा खर्चिएका छन् ।

उनले २०७४ सालमा गण्डकी प्रदेश सभा सदस्य भएयता प्राप्त भएकोमा थप गरी ७९ लाख ४२ हजार ३ सय ९० रुपैयाँ सामाजिक काममा खर्च गरेका हुन् ।

मंगलबार पे्रस युनियन कास्कीले आयोजना गरेको पत्रकार सम्मेलनमा मन्त्री थापाले २०७४ यता ५८ लाख ५८ हजार ५४३ रुपैयाँ प्राप्त भएको र त्यसमा करिब २१ लाख थप गरी सामाजिक कामका खर्च गरेको बताए ।

‘जनताको प्रतिनिधि भएपछि तिनको आवश्यकतालाई सम्बोधन गर्नु मेरो कर्तव्य हो । मैले पाएको सेवा–सुविधा बापतको रकम सामाजिक कार्यमा खर्च गर्दै आएको छु’, उनले भने ।

यसवर्षमात्रै उनले १० लाख एक हजार ३२४ रुपैयाँ सामाजिक कार्यमा खर्च गरेका छन् । शिक्षाका लागि छात्रवृत्ति, स्वास्थ्य क्षेत्रमा आधारभूत पूर्वाधार निर्माण, खेलकुद प्रवद्र्धन, महिला तथा युवाहरूको सशक्तिकरण, विपन्न परिवारलाई आर्थिक सहयोग जस्ता कार्यमा सहयोग गरेको मन्त्री थापाले बताए ।

मन्त्री थापाले हाल सामाजिक विकास, युवा तथा खेलकुद मन्त्रालयबाट ‘फ्राइडे फर फ्युचर’, ‘सिक्दै कमाउँदै’, योग तथा ध्यान कार्यक्रम ‘गण्डकी स्वजागरण’, प्राविधिक शिक्षाको पूर्वाधार निर्माण, महिला तथा युवा सशक्तिकरण कार्यक्रम सञ्चालन भइरहेको थापाले सुनाए । यस्तै, भाषा आयोगको सिफारिसमा मगर र गुरुङ भाषालाई सरकारी कामकाजी भाषा बनाउने विधेयक सदनमा छलफलको क्रममा रहेको पनि उनले जानकारी दिए ।