बारबर्दिया नगरका प्रमुख कार्यकारी अधिकृत कार्यालय समयमै मदिरा पिएर उपमेयरको कार्यकक्षमा गएपछि…

रुपन्देही । बर्दियाको बारबर्दिया नगरपालिकाका प्रमुख प्रशासकीय अधिकृत दिपक आचार्यले कार्यालय समयमै मदिरा सेवन गरी उपमेयरको कार्यकक्षमा गएर अराजक व्यवहार गरेको आरोप लागेको छ ।

उनीसँगै आर्थिक विकास समितिका संयोजक कृष्ण गौतम र सहायक प्राविधिक कर्मचारी नगेन्द्र भण्डारी पनि गएपनि उनीहरुले भने मदिरा सेवन गरेको प्रमाणित भएन । आचार्यसहित तीनै जना आफ्नो कार्यकक्षमा आएर अभद्र व्यवहार गरेको उपमेयर रत्नकुमारी पाण्डेले नेपाल प्रेसलाई बताइन् ।

‘प्रमुख अधिकृत आचार्य मदिराको नशामा मेरो कार्यकक्षमा आएर टेबल ठोक्दै धम्की दिनुभयो, मेयर र मलाई ‘सडकछाप’ बनाइदिने र घर जलाइदिने जस्ता आक्रामक बोलीहरू प्रयोग गरेपछि मैले मेयरलाई बोलाएर प्रहरीमा उजुरी गरेका हौं’ उनले भनिन् ।

मेयर छविलाल थारूका अनुसार आचार्यले कार्यालयको नियमित समयमा उपस्थित नभएर मातहत कर्मचारीहरूलाई अनियमित रूपमा अवकाश पत्र वितरण गर्न खोजेका थिए, जुन मेयरले रोकिदिएपछि आचार्यले फोनमै मेयरलाई धम्की दिएपछि विवाद बढेको हो ।

उपमेयरले मेयरलाई बोलाइपछि मेयर थारुले तत्काल प्रहरीलाई खबर गरेका थिए ।

घटनाको सूचना पाएपछि जयनगर प्रहरी कार्यालयले तीनै जनालाई नियन्त्रणमा लिएर नगर अस्पताल लगी मापसे परीक्षण गराएको र अस्पतालले आचार्यमा मदिरा सेवन गरेको तर गौतम र भण्डारी नशामुक्त रहेको भेटिएको थियो । मंगलबार दिउसोको घटना भएपनि राती भने तीनै जनालाई प्रहरीले छोडेको छ।

उता आरोपित आचार्यले फेसबुकमा मेयर थारूमाथि ‘पावर टिलर खरिदमा घुसखोरी’को आरोप लगाएका छन् । जसलाई मेयरले ‘निराधार र आवेगमय’ ठहर्याए। मेयरले स्पष्ट पारे अनुसार, नगरले किसानहरूको ५० प्रतिशत सहयोगमा पावर टिलर खरिद गर्न इ-बिडिङ प्रक्रिया अपनाएको हो, जुन आचार्यलाई मन नपरेको हो।

मेयर थारूले यस घटनालाई गम्भीरता लिँदै प्रमुख जिल्ला अधिकारी र प्रहरी प्रमुखलाई जानकारी दिएको बुधबार नगर कार्यपालिका बैठकमा यस विषयमा निर्णय हुने जनाएका छन्। आचार्य आगामी वैशाख १४ गतेबाट अनिवार्य अवकाशमा जाँदैछन्।

करारका कर्मचारी राख्ने र हटाउने विषयमा प्रमुख कार्यकारी अधिकृत आचार्यले कानुनी आधारमा गर्नुपर्ने जनाएका थिए भने मेयर तथा उपमेयरले भनेअनुसारका कर्मचारी नराखेका कारण आफूलाई दोषारोपण गर्न खोजिएको आचार्यको दावी छ । उनले फेबुकमा यसो लेखेपनि उनको मोबाइल नम्बर भने अफ रहेको छ ।

जिल्ला प्रहरी कार्यालय बर्दियाका सूचना अधिकारी ऋषिराम घर्तीमगरले कार्यालय समयमै बारबर्दियाका कार्यकारी प्रमुखले मदिरा सेवन गरेको खबर आएपछि प्रहरीले नियन्त्रणमा लिएर मापसे परीक्षण गराएको र अस्पतालबाट पनि उहाँले मापसे गरेको भेटिएको बताए ।

‘तीन जनाले उपमेयरको कक्षमा मापसे गरी अभद्र व्यवहार गरेको कुरा थियो, दुई जनाको भेटिएन, दिनभर राखेर छलफल गराइयो, लिखित निवेदन नपरेकाले साँझ छाडिएको छ, सरकारी कर्मचारी भएकाले कार्यालय समयमा त्यसो गरिनु उचित होइन’ उनले भने–‘लिखित उजुरी नपरेकाले उहाँहरु नै बसेर टुंगो लगाउनुहोला सायद ।’