बाँके राष्ट्रिय निकुञ्जमा हात्तीको आक्रमणबाट माउतेको मृत्यु

रुपन्देही। बाँके राष्ट्रिय निकुञ्जको खड्गवार हात्तीसारमा गणेशगज नामक हात्तीले आक्रमण गर्दा हात्तीको स्याहारमा खटिएका माउतेको मृत्यु भएको छ ।

बर्दिया ठाकुरबाबा नगरपालिका–९ निवासी ४५ वर्षीय आशाराम थारुको घटनास्थलमै मृत्यु भएको बाँके राष्ट्रिय निकुञ्जका वरिष्ठ संरक्षण अधिकृत वीरेन्द्र कँडेलले जनाएका छन् ।

कँडेलका अनुसार बुधवार राति ८ः३० बजेतिर थारु घाँस र दाना हाल्ने क्रममा गणेशगज हात्तीले थारुमाथि आक्रमण गरेको थियो। ‘पहिला सुँढले हानेर त्यसपछि किचेर मारेको उनको भनाइ छ ।

थारु २०७३ सालदेखि खड्गवार हात्तीसारमा गणेशगजको स्याहार गर्दै आएका थिए । सोही वर्ष उनी बाँकेमा बर्दियाबाट उक्त हात्ती लिएर आएका थिए । ‘हात्तीलाई मात चढ्दा आक्रमण गर्ने सम्भावना हुन्छ,केही दिनदेखि गणेशगजको व्यवहार आक्रामक देखिएको थियो’ कँडेलले भने ।

घटनापछि थारुको शव नेपालगन्ज मेडिकल कलेज शिक्षण अस्पताल, कोहलपुरमा राखिएको छ। पोष्टमार्टमपछि परिवारलाई शव बुझाउने तयारी भइरहेको प्रहरीले जनाएको छ।

निकुञ्ज प्रशासनले गणेशगजलाई हाल नियन्त्रणमा राखिएको बताएको छ। गणेशगजले यसअघि पनि माउतेमाथि आक्रमण गरिसकेको निकुञ्ज स्रोतले जनाएको छ। घटनाबारे थप अनुसन्धान भइरहेको छ।