प्रशासकीय अधिकृत गुरागाईँलाई हाजिर गराउन उपमेयर सुनिता पनि

काठमाडौं । साढे तीन महिनापछि कार्यालय फर्किएका प्रशासकीय अधिकृत सरोज गुरागाईँलाई काठमाडौं महानगरपालिकाका जनप्रतिनिधि र कर्मचारीले स्वागत गरेका छन् । मेयर बालेन्द्र साहबाहेकका जनप्रतिनिधिहरु प्रशासकीय अधिकृतको स्वागतमा खडा भएका हुन् ।

गुरागाईँलाई हाजिर गराउन उपप्रमुख सुनिता डंगोल पनि पुगेकी छन् । उपमेयर डंगोलले पहिल्यैदेखि यो विषयमा मेयर साहप्रति असन्तुष्टि राख्दै आएकी थिइन् । प्रशासकीय अधिकृतलाई काम गर्न दिनुपर्ने उनको अडान थियो ।

कर्मचारी र जनप्रतिनिधिले घेराउमा राखेर गुरागाईँलाई कार्यकक्षतिर लगेका थिए । तर, कार्यकक्षमा मेयर बालेन्द्र साहले ताला लगाइदिएका छन् । अहिले ताला फुटाउने काम भइरहेको छ ।