राजु पाण्डे कर्मचारीप्रति आक्रोशित, दिए यस्तो चेतावनी (भिडिओ)

काठमाडौं । काठमाडौं महानगरपालिकाका नगर प्रहरी प्रमुख राजु पाण्डे कर्मचारीहरूसँग आक्रोशित बनेका छन् । कर्मचारीले काम नगरेर कार्यालय कब्जा गर्न खोजेको भन्दै उनी जङ्गिए ।

आज प्रमुख प्रशासकीय अधिकृत सरोज गुरागाईँलाई कार्यालयभित्र प्रवेश गराउने क्रममा नगर प्रहरी र कर्मचारीबीच टकराब भइरहेको छ । कर्मचारी र जनप्रतिनिधिले गुरागाईँलाई स्वागत गरेर कार्यालयभित्र प्रवेश गराउँदा नगर प्रहरीले रोक्ने प्रयास गरे पनि सफल हुन सकेनन् ।

कर्मचारीले प्रशासकीय अधिकृतको कार्यकक्षको ढोकामा लागेको ताल्चा फुटाउने प्रयास गर्दा फेरि नगर प्रहरीले हस्तक्षेप गरेको थियो । त्यस क्रममा ढोकाको सिसा फुटेपछि नगर प्रमुख पाण्डे आक्रोशित बनेका थिए । उनले कर्मचारीलाई आफ्नो ठाउँमा बसेर काम गर्न चेतावनी दिए ।

पत्रकारसँग पाण्डेले भने, ‘कर्मचारीहरू काम नगरेर यसरी कार्यालयभित्र तोडफोड गरिरहेका छन् । कार्यालयको सुरक्षा गर्ने जिम्मा हाम्रो हो । हामी आफ्नो कर्तव्य निभाउँछौँ ।’

प्रशासकीय अधिकृतलाई कार्यकक्ष प्रवेश गर्न नदिने हो ? भन्ने प्रश्नमा उनले आफूहरूलाई स्पष्ट आदेश रहेको बताए । ‘हामीलाई स्पष्ट आदेश छ, त्यसको अक्षरशः पालना गर्छौँ,’ उनले भने ।

केही कर्मचारीले पाण्डेलाई हामीले पाँच महिनादेखि तलब पाएका छैनौँ, तपाईँलाई चाहिँ तलब चाहिँदैन भनेर सोधेका थिए ।

पाण्डेले भने, ‘हामीले पनि तीन महिनादेखि तलब पाएका छैनौँ । ६ महिना, एक वर्ष भोकै बस्नु परे पनि कर्तव्य छोड्दैनौँ । कार्यालयको सुरक्षा हाम्रो जिम्मा हो । चाहेमा जुनसुकै पदाधिकारीलाई पनि रोक्नेछौँ ।’

उपमेयरले प्रशासकीय अधिकृतलाई स्वागत गरेको विषयमा उनले भने, ‘उहाँसँग हाम्रो कुरा भइसक्यो ।’