ओली बुटवल आउने भएपछि लुम्बिनी प्रदेशसभा बैठक स्थगित, एमालेलाई फकाउने प्रयास

रूपन्देही । प्रमुख प्रतिपक्षी दल नेकपा एमालेका अध्यक्ष अगुवा कार्यकर्ता भेलालाई सम्बोधन गर्न बुटवल आउने भएपछि लुम्बिनी प्रदेशसभाको भोलिका लागि बोलाइएको बैठक स्थगित गरिएको छ । सदन बहिष्कार र अवरुद्ध गर्दै आएको प्रमुख प्रतिपक्षी दल नेकपा एमालेलाई फकाउने प्रयासस्वरुप प्रदेशसभा बैठक स्थागित गरिएको हो ।

एमालेले भदौ १ गतेदेखि नै निरन्तर सदनमा अवरोध एवम् बहिष्कार गरिरहेको छ । प्रदेशसभा बैठक भदौ ३१ गते दिनको १ बजेका लागि स्थागित गरिएको हो ।

एमालेका प्रमुख सचेतक भूमिश्वर ढकालले आफ्नो पार्टीको कार्यक्रम भएको सत्तारूढ दलका सचेतकहरूलाई जानकारी दिएको बताए । एमालेले आफ्नो पार्टीले कारबाही सिफारिस गरेका दुई सांसदलाई पदमुक्त नगरेसम्म सदन चल्न नदिने अडान लिएको छ ।

कांग्रेस प्रमुख सचेतक फखरूद्दिन खानले एमालेको विशेष कार्यक्रम भएकाले बुधबारको बैठक सार्ने सहमति भएको जनाए ।