आज बेलायती मन्त्रिपरिषद् पुनर्गठन हुँदै : विदेशमन्त्री र शिक्षामन्त्रीलाई हटाउने तयारी

लन्डन । कोभिड-१९ महामारीपछि जनताको जीवनस्तर उकास्ने उद्देश्यसहित बेलायती प्रधानमन्त्री बोरिस जोन्सनले मन्त्रिपरिषद् पुनर्गठन गर्ने भएका छन् ।

रोयटर्सका अनुसार प्रधानमन्त्री जोन्सनले मन्त्रिमण्डलमा पार्टीका वरिष्ठ नेताहरुलाई स्थान दिनेछन् । डाउनिङ स्ट्रिट स्रोतले जोन्सन सरकार महामारीपछि नागरिकको जीवनस्तर सुधार्न चाहन्छ ।

क्षेत्रीय असामनताको अन्त्य गर्ने जोन्सनको योजनालाई कोभिड महामारीले चुनौति दिएको छ । मार्गरेट थ्याचर नेतृत्वको सरकारपछि जोन्सनले खेपिरेहको यो चुनौतिलाई निकै ठूलो मानिएको छ ।

‘आज अपरान्ह प्रधानमन्त्री जोन्सनले केही मन्त्रीहरु नियुक्त गर्ने तयारी गर्नुभएको छ’ टेन डाउनिङ स्ट्रिट स्रोतले रोयटर्सलाई भन्यो । हिजो मात्र जोन्सनले आगामी अटम महीनामा महामारी व्यवस्थापन गर्ने योजना अघि सारेका थिए ।

केही साताअघि बेलायतमा मन्त्रिमण्डल पुनर्गठनको चर्चा चलेको थियो । अहिलेका शिक्षामन्त्री गाभिन विलमसन, विदेश मन्त्री डोमिनिक राव लगायतलाई हटाउने तयारी भएको जनाइएको छ ।

महामारीमा विद्यालयको व्यवस्थापनमा असफल भएको भन्दै शिक्षामन्त्री विलमसनले चर्को आलोचना खेपेका छन् । काबुलमा तालिबानले नियन्त्रण लिँदै गर्दा काम छाडेर बिदामा बसेको भन्दै विदेशमन्त्री राबलाई हटाउन लागिएको जनाइएको छ ।