मेस्सी र ग्रिजमनको २–२ गोलमा बार्सिलोना विजयी, रियल मड्रिड बराबरीमा रोकियो

एजेन्सी । बार्सिलोनाले स्पेनिस ला लिगामा अपराजित यात्रालाई आठौं खेलसम्म पुर्‍याउँदा ग्रानाडाको मैदानमा कप्तान लियोनल मेस्सी र स्टार स्ट्राइकर एन्टोइन ग्रिजमनले २–२ गोल गरे ।

१२ मिनेटमै ग्रिजमनको पहिलो गोलमा अफसाइड दावी गरिएको थियो । तर पछि ग्रानाडाको खेलाडीमा पास डिफ्लेक्ट भएको भनियो ।

३५ औंं मिनेटमा कप्तान मेस्सीले १८ यार्डबाट शानदार गोल गरे । त्यसको सात मिनेटपछि नै उनले चतूरतापूर्वक प्रहार गरेको फ्रिकिक गोलमा परिणत भएपछि पहिलो हाफमै पाहुना टोलीले ३–० को अग्रता बानाएको थियो ।

मेस्सीको ला लिगामा जारी सिजन ११ गोल पुगेको छ र उनी सर्बाधिक गोलकर्ताको शीर्ष स्थानमा छन् ।

६३ औं मिनेटमा ग्रिजमनले व्यक्तिगत दोस्रो गोल गरे । त्यसयता ७८ औं मिनेटमा ग्रानाडाका जेसस भालेज्जो रातो कार्ड खाँदै मैदान बाहिरिएपछि टोली १० खेलाडीमा समेटिएको थियो ।

यो जितले बार्सिलोनालाई अंकतालिकामा आफू अगाडि रहेका दुई टिमसँग दूरी कम गर्ने अवसर दिएको छ । १८ खेलबाट बार्सिलोनाले ३४ अंक पुगेको छ ।

१५ खेलबाट एट्लेटिको मड्रिडको ३८ र १८ खेलबाट रियल मड्रिडको ३७ अंक छ । एट्लेटिको मड्रिड र एथ्लेटिको बिल्बाओबीच हिजो हुनुपर्ने खेल स्थगित भएको छ ।

दोस्रो स्थानको रियल मड्रिडले चाहीँ रेलिगेसन जोनमा संघर्षरत ओसासुनासँग गोलरहित बराबरी खेल्दै अंक बाँड्नुपरेको छ ।

जिनेदिन जिदान प्रशिक्षित रियलले लिगमा पुछारबाट दोस्रो स्थानमा रहेको ओसासुनाको मैदानमा अधिकांश समय बल नियन्त्रणमा राखे पनि गोल गर्न सकेन । ओसासुनाका खेलाडीको प्रदर्शन बहादुरीपूर्ण थियो ।