राष्ट्रसंघीय महासभालाई चिनियाँ राष्ट्रपति सीको सम्बोधन : विश्वव्यापी विकास सहायतको प्रस्ताव

न्यूयोर्क । राष्ट्रसंघीय महासभालाई चिनियाँ राष्ट्रपति सी जिनपिङले मंगलबार राती भर्चुअल सम्बोधन गरेका छन् । अमेरिकी राष्ट्रपति जो बाइडेनले सम्बोधन गरै लगत्तै सी बोलेका थिए ।

राष्ट्रपति सीले आत्मविश्वासमा वृद्धि गर्दै सुरक्षित विश्व निर्माण गर्न विश्वव्यापी जोखिम र चुनौतिविरुद्ध लड्न विश्वव्यापी विकास सहायताको प्रस्ताव गरेका छन् ।

चिनियाँ अखबार ग्लोबल टाइम्सका अनुसार राष्ट्रपति सीले केही दशकयताका नदेखिने चुनौति र कोभिड-१९ महामारीविरुद्ध लड्न सामूहिक एकताको आवश्यकता औंल्याउँदै भिडिओ सम्बोधन गरेका थिए ।

उनले विज्ञानमा आधारित भएर कोरोनाभाइरसको उत्पत्तिबारे छानविन गर्नुपर्ने समेत सीले बताए । चीनले विदेशमा कोइलामा आधारित इन्धन परियोजनाको निर्माण नगर्ने घोषणा समेत सीले गरे । उनको यो घोषणालार्ई विश्व्यापी कार्बन उत्सर्जन कटौती गर्ने महत्वपूर्ण कदमको रुपमा लिइएको छ ।

आफ्नो महत्वाकाङ्क्षी पूर्वाधार परियोजना बेल्ट एन्ड रोड इनिसिएटिभ (बीआरआई)अन्तर्गत चीनले इन्डोनेसिया र भियतनाममा कोइला इन्धन परियोजना संचालन गरिरहेको छ ।

चीनले सन् २०६० सम्म कार्बन उत्सर्जनलाई तटस्थ तुल्याउने घोषणा पनि गरिसकेको छ । राष्ट्रपति सीको घोषणा लगत्तै विज्ञप्ति जारी गर्दै अमेरिकी जलवायु परिवर्तनका विशेष दूत जोन केरीले चीनको यो कदम महत्वपूर्ण कदम भएको भन्दै खुशि व्यक्त गरेका छन् ।