जर्मनीमा भोलि संसदीय चुनाब हुँदै, १६ वर्षपछि सत्ताबाट बाहिरिने तयारीमा एन्जेला मर्केल

बर्लिन । जर्मनीका मतदाताहरु आइतबार संघीय चुनाबको निर्वाचनमा मतदान गर्न बुथतर्फ प्रस्थान गर्ने तयारीमा छन् । यो चुनाबमा कुन दलले जित्नेछ, आगामी चान्सलर को हुनेछ र सरकार गठबन्धन कस्तो बन्नेछ भन्ने चाहिँ यकिन छैन ।

मध्य बामपन्थी दल सोसल डेमोक्रेटिक पार्टी (एसपीडी) र कन्जरभेटिभ क्रिस्चियन डेमोक्रेटिक युनियन तथा यसको भातृ दल क्रिस्चियन सोसल युनियनबीच कडा प्रतिस्पर्धा हुने आंकलन गरिएको छ ।

एलेनब्याच इन्स्टिच्युटले गरेको सोधमा यी दुई प्रतिस्पर्धी दलले २६ र २५ को आँकडाको मत प्राप्त गर्नेछन् ।

तर, अन्य सर्वेक्षणले चाहिँ एसपीडी पार्टीले ३ प्रतिशतले अग्रता हासिल गर्न सक्ने प्रक्षेपण गरेका छन् । तर, विज्ञहरुले चाहिँ अझै पनि कुन दललाई मत दिने भनेर निर्णय नगरिसकेका धेरै मतदातालाई यस्ता सर्वेक्षणले प्रभावित तुल्याउन सक्ने भन्दै सतर्क हुन आग्रह गरिरहेका छन् ।

आइतबार स्थानीय समयनुसार बेलुका ६ बजे मतदान सकिएपछि एक्जिट पोलहरु सार्वजनिक गर्ने तयारी छ ।

१६ वर्षपछि सत्ताबाट बाहिरिने एन्जेला मर्केलको निर्णयपछि कसले जर्मनीलाई हाँक्छ भन्ने यकिन छैन । आइतबारको चुनाबले मर्केलको सत्ताबाट बाहिरको मार्गप्रशस्त गर्नेछ । यसपटक जलवायु परिवर्तनको मुद्दा चुनावमा प्रभावशाली बनेको छ ।

शनिबार बर्लिनस्थित संसद भवनबाहिर जलवायु अभियन्ता ग्रेटा थनबर्गको नेतृत्वमा जलवायु विपदविरुद्धको प्रदर्शन भएको थियो ।