फेसबुकको लोकप्रियतामा आउँदैछ गिरावट : कम्पनीको आन्तरिक रिपोर्टिङ सार्वजनिक

काठमाडौं । इन्टरनेटको सामाजिक संजाल फेसबुकलाई शक्तिशाली मानिन्छ । तर, फेसबुक कम्पनीभित्रैको आन्तरिक रिपोर्टमा भने पछिल्लो समय लगातारको आर्थिक संकटसँग कम्पनी जुधिरहेको र लोकप्रियतामा गिरावट आएको उल्लेख छ ।

साथै, अमेरिकी युवाहरुमा फेसबुकप्रतिको लोकप्रियतामा कमी आएको समेत उक्त रिपोर्टले उल्लेख गरेको छ । कम्पनीको साखमा समेत कमी आएको भनिएको छ ।

कोरोना कालमा भ्याक्सिनलाई लिएर भएका अफवाहका पोस्टले समेत फेसबुकको विश्वसनियतामा कमी आएको भनिएको छ । साथै, फेसबुक कम्पनीको इन्स्टाग्राममा हुने बडी इमेजलाई लिएर समेत अभिभावकलाई टाउको दुःखाइ विषय भएको रिपोर्ट दिइएको छ ।

केही मुलुकमा फेसबुकले सरकारी कडाइको सामना गर्नु परिरहेको छ । अमेरिकी संसदमा हालै भएको सुुनुवाइमा फेसबुकमा ग्लोबल सेक्युरिटी प्रमुख एंटीगेन डेविसलाई सांसदले उपभोक्ताको सुरक्षाबारे निकै सोधपुछ समेत गरे ।

फेसबुकले लोकतन्त्रलाई कमजोर बनाउँदैछ

फेसबुक कम्पनीकी एक पूर्व अधिकारीले अमेरिकी सांसदले सोधेका प्रश्नको जवाफमा फेसबुकले बालबालिकालाई असर पारेको, विभाजनको खाडल सिर्जना गरेको र लोकतन्त्रलाई कमजोर पारेको आरोप लगाएकी छिन् ।

क्यापिटल हिलमा आयोजित संसदीय सुनुवाइमा कम्पनीकी पूर्व प्रोडक्ट म्यानेजर ३७ वर्षिया फ्रान्सिस हुगेन फेसबुकको आलोचनामा उत्रिइन् । उनी फेसबुककी हिवस्टलब्लोर समेत भनेर पछिल्लो समय चर्चित छिन् ।

फेसबुकले पछिल्लो समय उपभोक्ताको सुरक्षालाई लिएर निकै आलोचना र दबाब खेपिरहेको छ । तर, फेसबुक संस्थापक मार्क जुकरबर्गले यी आलोचनाहरु कम्पनीको छवि विगार्ने नियतले आएको भन्दै खण्डन गरेका छन् ।

फेसबुकमा लामो ब्लग लेख्दै जुकरबर्गले उपभोक्ताको सुरक्षालाई लिएर कम्पनी गम्भीर रहेको बताउँदै इन्टरनेट रेगुलेसनलाई अपडेट गर्नेबारे आफूहरु अघि बढेको बताएका छन् । साथै उनले अमेरिकी संसदलाई केही प्रश्नहरु सोधेका छन् ।

किशोरकिशोरीले इन्टरनेट चलाउने सबैभन्दा उपयुक्त उमेर कुन हो ? इन्टरनेट सेवाले कसरी मानिसहरुको उमेरलाई प्रमाणीकरण गर्ने ? अभिभावकले निगरानी गर्न मिल्ने गरी किशोरकिशोरीको गोपनियतालाई कसरी सुरक्षित गर्ने ?

ब्लगमा जुकरबर्गले कम्पनीको छविलाई धमिल्याउने प्रयास भएको भन्दै असन्तुष्टि समेत व्यक्त गरेका छन् ।