अरुणाञ्चलमा भारतीय र चिनियाँ सेनाबीच झडप, पीएलएले सीमा पार गरेको भारतको आरोप

दिल्ली । भारतको अरुणाञ्चल प्रदेशमा भारतीय र चिनियाँ सुरक्षाकर्मीबीच पुनः झडप भएको छ । भारतीय संचारमाध्यमका अनुसार दुईसय चिनियाँ जनमुक्ती सेना लाइन अफ एक्चुअल कन्ट्रोल (एलओसी) पार गर्दा भारतीय सुरक्षाकर्मीले रोक्ने प्रयास गर्दा यसैसाता सो झडप भएको बताइन्छ ।

चीन सीमावर्ती क्षेत्रमा नियमित गस्ती गर्दा सो झडप भएको एनडीटीभीले जनाएको छ । तर, केही समयपछि दुबै पक्षका कमान्डरले विवाद साम्य पारेपछि सेनाहरु पछि हटेको जनाइएको छ ।

स्रोतका अनुसार केही घण्टासम्म दुबै पक्षका सेनाबीच धक्कामुक्का भएको थियो र विद्यमान सीमा प्रोटोकलअनुसार विवाद साम्य भएको थियो । तर, झडपमा कुनै क्षति नपुगेको भारतीय सुरक्षा स्रोतले जनाएको छ ।

बिहीवार भारतीय विदेश मन्त्रालयद्वारा आयोजित नियमित प्रेस ब्रिफिङमा प्रवक्ता अरिन्दम बागचीले भारतले चीनबाट सीमा प्रोटोकल र नियम कार्यान्वयनको अपेक्षा गरेको बताएका थिए ।