मोतिपुरमा प्रहरी दमनप्रति सुकुम्बासी संगठनको विरोध, गृहमन्त्रीको राजीनामा माग

काठमाडौं । नेपाल भूमिहीन सुकुम्बासी संगठनले रुपन्देहीको मोतिपुरमा हिजो भएको घटनाप्रति आपत्ति जनाउँदै गृहमन्त्री बालकृष्ण खाणको राजीनामा मागेको छ । संगठनका अध्यक्ष शान्ता चौधरीले विज्ञप्ति जारी गर्दै स्वतन्त्र न्यायिक छानविन समिति गठन माग गरेकी छिन् ।

‘सो घटना अमानवीय, गैरकानूनी भएको ठहर गर्दै घटनाको सत्य तथ्य जाँचबुझ गर्न नेपाल मानव अधिकार आयोग, नागरिक समाज, पत्रकार महासंघलगायतको स्वतन्त्र न्यायिक छानविन समिति गठन गरी घटनामा परी ज्यान गुमाएकाको परिवारलाई उचित राहत र घाइते भएकाहरूलाई औषधीउपचारको उचित व्यवस्था गर्न माग गर्दछौं,’ विज्ञप्तिमा भनिएको छ।

‘साथै ज्यान जाने गरी घटना घटाउने पक्षलाई तत्काल कानूनी दायरामा ल्याई सार्वजनिक गर्न र कानूनबमोजिम कारवाही गर्न माग गर्दछौं,’ विज्ञप्तिमा भनिएको छ, ‘यो हिंसात्मक घटनाको पूर्णजिम्मेवारी सरकारका गृहमन्त्रीले लिँदै पदबाट तत्काल राजीनामा दिन माग गर्दछौं । यदि हाम्रा मागहरू सम्बोधन नभएमा देशभरका तमाम सुकम्बासी भूमिहीन अव्यवस्थित बसोबासीहरू आन्दोलित हुन बाध्य हुने व्यहोरा जानकारी राइन्छ।’

मोतिपुर घटनामा चारजना सर्वसाधरणको ज्यान गएको थियो भने केही सुरक्षाकर्मी घाइते भएका थिए ।