दशैं मनाउन श्रीमान विदेशबाट आए, छोरा लिएर श्रीमती बेपत्ता

रुपन्देही । श्रीमान विदेशबाट आएको एक महिनामै रुपन्देहीबाट एक महिला ९ वर्षीय छोरा लिएर बेपत्ता भएकी छन् । गुल्मीको मुसीकोट नगरपालिका वडा नम्बर ५ घर भई हाल बुटवल कालिकानगर आफन्तकोमा बस्ने ३१ वर्षीया संगीता गैरे ९ वर्षीय छोरा दिक्षान गैरेलाई लिएर बेपत्ता भएको उनका श्रीमान खडानन्द गैरे देउतीले बताए ।

आफू वैदेशिक रोजगारीको शिलशिलामा भियतनाममा रहेको र एक महिना अगाडि मात्रै घरमा आएको उनले जानकारी दिए ।

उनले नेपाल प्रेससँग भने– तीन वर्ष भियतनाम बसेर आएको हुँ, भारत, दुबई, कतार गरेर ११ वर्ष विदेश बसें तर अहिले आएर यस्तो पीडा बोक्नु पर्यो । मैले विदेशबाट कमाएको सबै रकम घरमै पठाउँथे, अहिले त्यो रकम कहाँ गयो भन्ने पनि पत्तो छैन, मलाई अहिले केही चिन्ता छैन रकमको, छोरासहित वेपत्ता भएर चिन्ता लागेको उनले भने ।

संगीता बिगत् सात–आठ वर्षदेखि छोरासहित सानीआमाको घरमा बस्दै आएकी थिइन् । उनका सानीआमाको परिवार भने लण्डनमा रहेको छ ।

असोज २२ गतेदेखि श्रीमती छोरासहित बेपत्ता भएर घर र माइतको सम्पर्कमा नआएपछि खोजीका लागि खडानन्दले मानवअधिकारकर्मी, पत्रकार तथा प्रहरीलाई अनुरोध गरेका छन् ।

गैरेले भने, ‘सानीआमाको घरबाट केही नभनी निस्केर हिंडेकी थिइन्, ९ दिनसम्म पनि घरमा आएकी छैनन्’ आफन्तहरु सबैकहाँ सोधीखोजी गर्दा पनि केही पत्ता नलागेको खडानन्दले बताए । प्रहरीकोमा निवेदन दिएपनि केही पत्तो नलागेको र केही पत्तो लागेमा ९८१८९२३५९४ मा सम्पर्क गरिदिन उनले आग्रह गरेका छन् ।

एम्स स्कुल राजमार्ग चौराहामा कक्षा ३ मा अध्ययनरत ९ वर्षीय छोरा दिक्षान गैरेलाई साथमा लिएर श्रीमती सम्पर्कबिहीन भएदेखि मोवाइल पनि स्वीच अफ गरेको जानकारी दिंदै उनले खोजी गरिदिन सबैसँग अनुरोध गरेका छन् ।