प्रदेश २ मा बिहानैदेखि मुसलाधारे वर्षा, जनजीवन प्रभावित

जनकपुरधाम । बिहानैदेखिको मुसलाधारे वर्षाका कारण प्रदेश २ को जनजीवन प्रभावित बनेको छ । धनुषा, सिरहा, सप्तरी, महोत्तरीलगायतका जिल्लामा बिहानैदेखि वर्षा जारी छ ।

वर्षाले जनकपुरधाम सुनसान देखिएको छ । ठाउँठाउँमा पानी जमेर आवत–जावतमा समस्या भएको छ । बजारका अधिकांश पसल बन्द छन् । वर्षाले घरबाट बाहिर निस्किने अवस्था छैन ।

बेमौसमी वर्षाले किसान समस्यामा परेका छन् । काटेर भित्र्याउने बेला भएको धानबालीमा वर्षाले ठूलो क्षति पुगेको किसानहरु बताउँछन् । धानबाली डुबेपछि किसानहरु चिन्तित बनेका हुन् ।

मुसलाधारे वर्षाले नदीनालामा बाढी आउने खतरा बढेको छ । वर्षासँगै तीव्र गतिमा हावा चलिरहेका कारण फुसका घरहरु भत्किने खतरा बढेको छ ।