सेती नदीमा पनि बाढी, मोटरेबल पुल जोखिममा (फोटो/भिडियो)

कैलाली । लगातार परेको पानीका कारण सेती नदीमा पनि बाढी आएको छ। सेती नदीमा पानीको बहाव ८.४ क्युसेक पुगेको छ । यो ‘वार्निङ प्वाइन्ट’भन्दा माथि हो ।

डोटीको गोपघाट र दिपायलस्थित समूहगाढमा रहेको बाढी मापन केन्द्रका अनुसार ३.५ क्युसेक बाढीको बहाव हुँदा नदीमा बाढीको बढी खतरा हुने गर्दछ । सेती नदीमा आएको बाढीले डोटीमा रहेको मोटरेबल पुल छुन थालेको छ ।

नदी आसपासका बस्तीमा खतरा बढेको छ । नदीमा आएको बाढीले नदी किनारको बस्तीमा क्षति गर्न थालेको स्थानीय टेकराज उपाध्यायले जानकारी दिए ।

उनले पुलको एक छेउ कटानमा परेको हुँदा पुल नै जोखिममा परेको बताए । दिपायल सिलगढी नगरपालिका २ स्थित पुल बजार पनि डुबानमा रहेको छ । भागेगडामा रहेको कृषि ज्ञान केन्द्र पनि जोखिममा रहेको उनले बताए ।