नेपाली फिल्म ‘अ स्केरक्रो’ले जित्यो फ्लोरेन्स फेस्टिभलमा आइरिस-७५ अवार्ड

काठमाडौं । निर्देशक राजेशप्रसाद खत्रीद्वारा निर्देशित फिल्म ‘अ स्केरक्रो’ले युनिसेफ इनोचेन्टी फिल्म फेस्टिभलमा युनिसेफ आइरिस ७५ अवार्ड जितेको छ ।

युनिसेफको अनुसन्धान कार्यालय-इनोचेन्टीले आयोजना गरेको महोत्सवले वर्तमान समयमा बालबालिका हुनुको अर्थ के हो भन्ने सन्देश बोकेका फिल्महरुको उत्सव मनाउँछ ।

इटालीको फ्लोरेन्समा २१ देखि २४ अक्टोबरसम्म आयोजना हुने महोत्सवमा २९ देशबाट सहभागी हुने ३९ फिल्मको प्रदर्शन हुन्छ । युनिसेफको ७५ औं वर्षगाँठको अवसरमा वितरण गरिने ‘युनिसेफ ७५ आइरिस’ संसारभर मनाइने युआइएफएफको उत्कृष्ट सम्मान पनि हो ।

विद्यालयका शिक्षक समेत रहेका नेपाली फिल्म निर्देशक खत्रीले लेखन तथा निर्देशन गरेको फिल्मलाई उक्त पुरस्कारमा चयन गरिएको जारी वक्तव्यमा उल्लेख छ ।

‘दुर्गम गाउँको शिक्षक भएको नाताले मैले निर्दोष बालबालिकाको एउटा समूहसँग कुराकानी गर्ने मौका पाएको छु । मुख्यतः सत्य कथाहरुलाई प्रस्तुत गरी चलचित्रको माध्यमबाट म बालबालिकाको अधिकारको वकालत गर्न चाहन्छु र यी कथाहरुलाई संसारका सबै भागमा पुग्ने आशा गर्छु’ खत्रीले भने ।