मानव अधिकार तथा शान्ति समाजले माग्यो प्रधानन्यायाधीशको राजीनामा

रूपन्देही । मानव अधिकार तथा शान्ति समाजले प्रधानन्यायाधीश चोलेन्द्रशम्शेर जबराले तत्काल राजीनामा दिनुपर्ने बताएको छ ।

शान्ति समाजका केन्द्रीय अध्यक्ष गोविन्द खनालले विज्ञप्ति जारी गरी प्रधानन्यायाधीशले राजीनामा नदिएको खण्डमा महाअभियोगको प्रक्रिया अघि बढाइ उनको बहिर्गमन सुनिश्चित गर्न राजनीतिक दलहरूसँग माग गरेका छन् ।

‘यो असामान्य अवस्थालाई सामान्यीकरण गर्ने प्रमुख दायित्व प्रधानन्यायाधीश चोलेन्द्रशम्शेर जबराको भएको हुँदा उनले शीघ्र राजीनामा दिइ निकास दिन मानव अधिकार तथा शान्ति समाज आग्रह गर्दछ’, विज्ञप्तिमा भनिएको छ ।

न्यायिक क्षेत्रमा विद्यमान विकृतिहरू अन्त्य गर्न शुद्धीकरणका लागि सबै क्षेत्रबाट पहल आवश्यक रहेको भन्दै समाजले प्रधानन्यायाधीशको राजीनामा/बहिर्गमन न्यायिक क्षेत्रमा शुद्धीकरणको पहिलो पाइला हुने बताएको छ ।