सरकारले मिडिया चलाउनुहुँदैन : मुख्यमन्त्री पाण्डे

चितवन । नेपाल पत्रकार महासंघ वागमती प्रदेशको प्रादेशिक सम्मेलन सौराहामा सुरु भएको छ । सम्मेलनको आज वागमती प्रदेशका मुख्यमन्त्री राजेन्द्र पाण्डेले उद्घाटन गरेका छन् ।

सम्मेलनमा बोल्दै मुख्यमन्त्री पाण्डेले सरकारले मिडिया चलाउन नहुने बताएका छन् । तत्कालीन प्रदेश मुख्यमन्त्री डोरमणी पौडेल नेतृत्वको सरकारले प्रदेश स्तरीय मिडिया सेन्टर बनाउन खोजेपछि आलोचना भएको थियो ।

‘सञ्चार माध्यम प्रदेशले चलाउने गरि १० करोड पनि राखियो, त्यसको व्यापक विरोध पनि भयो, हामीले पनि प्रतिवाद गर्यौ’, उनले भने, ‘राम्रो काम गरेपछि मिडियाले नराम्रो भनेर लेख्न मिल्दैन, मिडिया राज्यले सञ्चालन गरिरहनुपर्दैन ।’ उनले फ्रिज भएर बसेर १० करोड बजेटलाई पत्रकार महासंघसँग छलफल गरेरै ठिक काममा लगाउने प्रतिबद्धता जनाए ।

उनले चितवनमा आमसञ्चार प्रतिष्ठान र हेटौंडामा पत्रकारहरुको प्रदेशस्तरिय कार्यालय बनाउन केन्द्रसम्म पहल गर्ने बताए । उनले राज्यव्यवस्था सिध्याउनुपर्छ भनेर लेख्नेहरुलाई माया नगर्ने अभिव्यक्ति दिए । ‘संघीयता, संविधान, समावेशीता, लोकतन्त्र विरोधी हुनुभयो भने तपाईहरुलाई माया हुँदैन’, उनले भने, ‘राजनीतिक स्थिरता कायम गर्न भूमिका खेल्नुहोस् ।’ उनले प्रदेशभित्रका हरेका १ सय १९ पालिकामा रहेका लोपोन्मुख, सिमान्तकृत र दलित समुदाय मध्येबाट एसईई पछि ३ वर्षे प्राविधिक कोर्स निशुल्क पढाउने गरि निर्णय भएको बताए ।

उनले एकल पार्टीको बहुमत सरकारमा नभएकाले साझा विचार बोकेरै सरकारले काम गर्ने बताए । नेपाल पत्रकार महासंघका केन्द्रीय अध्यक्ष विपुल पोखरेलले महासंघ प्रेस स्वतन्त्रताको पक्षमा सदैव अडिग रहने बताए । सञ्चार नीति बनाउदा अंकुश लगाउने प्रयास भैरहेकाले खबरदारी गर्न आग्रह गरे ।

वागमती प्रेस कार्यालयका प्रेस रजिस्ट्रार रेवती सापकोटाले पत्रकारको क्षमता अभिवृद्धि गर्ने कामलाई जोड दिनुपर्ने बताए । नेपाल प्रेस युनियनका बरिष्ठ उपाध्यक्ष दीपक आचार्यले पत्रकारहरुका समस्या सम्बोधन गर्न तीनै तहका सरकार गम्भीर बन्नुपर्ने बताए । पत्रकार महासंघ बागमती प्रदेश संस्थापक अध्यक्ष प्रताप विष्टले चितवनमा आमसञ्चार प्रतिष्ठान बनाउन पहल गर्नुपर्ने बताए। विगतमा सञ्चार क्षेत्रमा उपेक्षा पर्यो, उनले भने–अब पत्रकारलाई पेन्सन र सुत्केरी भत्ता दिने व्यवस्था पनि गरौं, मिडिया क्षेत्रको वृद्धि विकासमा प्रदेश सरकार लाग्नुपर्छ ।

प्रेस सेन्टर नेपाल वागमती प्रदेशका संयोजक लक्ष्मण खड्काले श्रमजीविले भोग्दै आएका समस्या र संकट समाधान गर्न लागिपर्न सुझाए । प्रेस चौतारी नेपाल वागमती प्रदेशका सहसंयोजक शिशिर सिंखडाले पत्रकार हक हित, सुरक्षाकालागि विशेष चासो दिनुपर्ने बताए । कम्तिमा पत्रकार परिचयपत्र जिल्ला तहबाटै बनाउने वातावरण बनाउन आग्रह गरे ।

महासंघका प्रदेश अध्यक्ष शिव देवकोटाले सम्मेलनबाट १० जिल्लाको सुझाव संकलन गरेर ३ वर्षिय कार्ययोजना बनाइने बताए । पेशागत समस्या समाधानबारे सम्मेलन केन्द्रीत हुने बताए । उनले १० करोड बजेट विनियोजन गरेर स्वरोजगार मिडिया प्रवर्द्धन गर्न मुख्यमन्त्रीसँग माग गरे । पत्रकार महासंघ चितवनका अध्यक्ष नारायण अधिकारीले आमसञ्चार प्रतिष्ठान र तालिम केन्द्र चितवनमा बनाउन सहयोग गर्न आग्रह गरे । सम्मेलनमा प्रदेश अन्तर्गतका १० जिल्लाका अध्यक्ष, सचिव र कोषाध्यक्ष र प्रदेश समितिका पदाधिकारी तथा सदस्यहरु सहभागी भएका छन् । सम्मेलन आइतबार सकिनेछ ।