अरुका कुरा नपत्याउनुस, महाधिवेशन तोकिएकै समयमा हुन्छ : देउवा (भिडिओ)

काठमाडौं । प्रधानमन्त्री एवम् नेपाली काँग्रेसका सभापति शेरबहादुर देउवाले पार्टीको १४ औं महाधिवेशन तोकिएको समयमै हुने बताएका छन् । शुक्रबार भक्तपुरमा आयोजित शुभकामना आदानप्रदान कार्यक्रममा उनले पार्टी महाधिवेशन स्वस्थ रुपमा हुनुपर्ने भन्दै जित र हारले पार्टी भित्र दुश्मनी बढाउनु नहुनेमा जोड दिए ।

प्रधानमन्त्री देउवाले भने, ‘अहिले पार्टी अधिवेशन आउँदै छ, यसमा देशभरबाट सर्वसम्मतिमा सभापति बनाउनुस्, हुँदै हुँदैन भने स्वस्थ प्रतिष्पर्धाबाट सभापति बनाउनुस् ।’

उनले अगाडि थपे, ‘प्रतिस्पर्धामा जित–हार हुन्छ । हार्नेले जित्नेको सहयोग र जित्नेले हार्नेको सहयोग लिनुपर्ने हुन्छ, । जित हारमा दुश्मनी नबढोस् । पार्टी भित्रको मामिला हो । त्यस्तो अधिवेशन हुनुपर्छ । जसले जे भने पनि कुरा नपत्याउनुस्, अधिवेशन समयमा हुन्छ, हुन्छ । अब अधिवेशन पार्टी सभापतिको हातमा छैन, निर्वाचन समितिको हातमा छ । मैले चाहेर पनि हुँदैन, मैले भनेर पनि हुँदैन,अधिवेशनको तयारीमा लाग्नुहोला ।’

प्रधानमन्त्री देउवाले पार्टीका नेता, कार्यकर्तालाई महाधिवेशनको तयारीमा लाग्न आग्रह पनि गरे ।