गौरीघाटमा रेखाले मनाइन् छठ् (तस्बिरहरु)

काठमाडौं । छठ पर्वका अवसरमा अभिनेत्री रेखा थापाले गुह्येश्वरीस्थित वाग्मती किनारमा पूजा आराधाना गरेकी छिन् । रेखाले काठमाडौंमा बसोबास गर्न थालेपछि गृहयेश्वरीमा छठ मनाउँदै आएकी छिन् । अन्य व्रतालुसँग मिलेर उनले छठ मनाएकी हुन् ।

सो अवसरमा रेखाले गौरीघाटमा छठ मनाउन आउने अन्य व्रतालुसँग भलाकुसारी पनि गरिन् । राष्ट्रपति विद्यादेवी भण्डारीले आजै गुह्येश्वरी गौरीघाट क्षेत्रको छठ पर्वको उद्घाटन गरेकी थिइन् । त्यहाँ निर्माण गरिएका ६७५ छठ घाट अर्थात् पूजास्थलमा जम्मा भएका बर्तालुले पनि अस्ताउँदो सूर्यलाई पूजा आरधनासहित अर्घ दिएर छठ पर्वको मुख्य दिनको विधि पूरा गरेका छन् ।

चारदिने छठ पर्वको मुख्य एवं तेस्रो दिन आज अस्ताउँदो सूर्यलाई पूजा आराधनासहित अघ्र्य दान गरेका बर्तालु रातभर छठ घाटमै जाग्राम बस्छन् । कार्तिक शुक्ल सप्तमीका दिन बिहीबार बिहान उदाउँदो सूर्यलाई अघ्र्य दान गरेपछि चारदिने छठ पर्व समाप्त हुन्छ ।

कोरोनाका कारण गत वर्ष रोकिएको छठ मनाउन यस वर्ष गुह्येश्वरी गौरीघाट क्षेत्रमा हजारौँ भक्तजनको उपस्थिति रहेको गुह्येश्वरी गौरीघाट छठ पूजा समितिले जनाएको छ ।

कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व सोमबारदेखि शुरु भएको हो । ऐतिहासिक पौराणिक ग्रन्थ महाभारतमा उल्लेख भएअनुसार द्रौपदीसहित पाँच पाण्डव अज्ञातवासमा रहँदा उक्त गुप्तवास सफल होस् भनी सूर्यदेवलाई आराधना गरिएको थियो । त्यस समयमा पाण्डव विराट राजाको दरबारमा बास बसेको उल्लेख छ । लोककथनबमोजिम सोही समयदेखि छठ मनाउने परम्पराको थालनी भएको हो ।