‘बबी’ अभिनेत्रीले ल्याइन् अटो-बायोग्राफी, भन्छिन् : फिल्ममा छुटेका कुरालाई बुकमा समेटेकी छु (भिडिओ)

काठमाडौं । सन् २०१८ मा रिलिज भएको फिल्म बबी अभिनेत्री कविता गुरुङले आत्मकथा प्रकाशित गरेकी छिन् । सोमबार राजधानीमा आयोजित पत्रकार सम्मेलनमा उनीद्वारा लिखित ‘म अनि मेरो’ बायोग्राफी लोकार्पण भयो ।

निर्देशक मिलन चाम्सले गुरुङको उक्त अटो-बायोग्राफी लन्च गरेका थिए । फिल्ममा नसमेटिएका प्रसंग र तथ्यलाई पुस्तकमा समेटिएको जानकारी गुरुङले दिइन् ।

नेपाल प्रेससँग उनले भनिन्, ‘फिल्ममा समेटिन नसकेका कुराहरुलाई पुस्तकमा समेटेकी छु । टीकटकको जमानामा बुक कसले पढ्छ र ? मैले विक्री गर्न बुक लेखेकी होइन । तरपनि पाठकले यसमा इन्जोय गर्नुहुन्छ ।’

उनले भनिन्, ‘फिल्म बनाउँदा साढे २ घण्टामा धेरै कुरा छुटेको छ । पुस्तक लेख्दा त्यतिबेलाको म भएर लेखेकी छु । जुन बेला म बुहारी भएर आएँ, त्यो बेलाको कुरा लेखेकी छु ।’

जीवन यात्रामा भेटिएका पात्र र भोगेका घटनालाई पुस्तकमा उतारेको जानकारी उनले दिइन् । ‘म व्यवसायिक लेखक होइन तर, म बुक लेखक भएँ । ४० वर्ष लाग्दासम्म मैले फिल्म बनाउँछु भनेर सोचेकी थिइँन न त बुक लेख्छु भन्ने नै लागेको थियो’ गुरुङले भनिन् ।

पुस्तकमा अन्तरजातिय बिहे गर्दाको भोगाइ, अनुभवसहित नेपालदेखि नर्वेसम्मको यात्राका अनुभव समेटिएको उनले जनाइन् । पति उमेश थापाको मद्दतले पुस्तक लेख्न सकेको कविताको कथन छ ।

‘म बेस्ट छोरी होइन । बेस्ट बुहारी पनि होइन । बेस्ट आमा बन्ने प्रयास गर्दैछु’ उनले भनिन् ।

तीनवर्ष अघि प्रदर्शनमा आएको उमेश र कविताको बायोपिक फिल्म बबीले नेपाली बक्सअफिसमा राम्रो कमाइ गरेको थियो ।