चैत दोस्रो साता टुँडिखेलमा राष्ट्रिय लोकदोहोरी महोत्सव हुने

काठमाडौं । लोक संस्कृतिको जोगाउने उद्देश्यले चैतको दोस्रो साता काठमाडोंमा ‘राष्ट्रिय लोक दोहोरी महोत्सव २०७८’ आयोजना हुने भएको छ । टुँडिखेलमा महोत्सव गर्न लागिएको आयोजक डीएआर मूभिजका सञ्चालक श्याम धितालले जनाए ।

उनका अनुसार महोत्सवमा दुई सयभन्दा बढी स्टल रहने तथा विभिन्न जिल्लाको कला-संस्कृति झल्कने झाँकीदेखि विभिन्न जिल्लाका स्थानीय कलालाई देखाउने गरी कार्यक्रम आयोजना हुनेछ ।

२०७६ साल फागुनदेखि डीएआर मुभिज टुँडिखेलमा महोत्सव आयोजना गर्दै आएको थियो । सो महोत्सवमा २७ जिल्लाका सांस्कृतिक झाँकी प्रस्तुत गरिएको थियो । पाँच दिनसम्म चलेको महोत्सवमा पाँच लाखभन्दा बढी दर्शकले अवलोकन गरेका थिए ।

आगामी फेस्टिभलमा १० लाखभन्दा बढी दर्शकले फेस्टिभल अवलोकन गर्ने अपेक्षा गरिएको छ । दर्शकले निःशुल्क प्रवेश पाउने भएका छन् ।