कोरोनाको भेरिएन्ट रोक्न ‘यात्रा व्यवस्थापन आदेश’ जारी गर्ने मन्त्रिपरिषद्को निर्णय

काठमाडौँ । कोरोनाभाइरसको नयाँ भेरिएन्ट ओमिक्रोन संक्रमण भएका मुलुकबाट हुनसक्ने सम्भावित संक्रमण्लाई रोक्न सरकारले ‘यात्रा व्यवस्थापन आदेश’ जारी गर्ने निर्णय गरेको छ । सोमबार बसेको मन्त्रिपरिषद्को बैठकले ओमिक्रोन देखिएका मुलुकबाट आउने यात्रुको लागि ‘यात्रा व्यवस्थापनसम्बन्धी आदेश’ जारी गर्ने निर्णय गरेको हो ।

मन्त्रिपरिषद् निर्णय सार्वजनिक गर्दै सरकारका प्रवक्ता तथा सूचना तथा सञ्चार प्रविधिमन्त्री ज्ञानेन्द्रबहादुर कार्कीले सो जानकारी दिएका हुन् । आजसम्म १८ वटा मुलुकमा भेरिएन्ट फैलिइसकेको छ ।

सरकारले त्रिभुवन अन्तर्राष्ट्रिय विमानस्थल र भारतसँग सिमाना जोडिएका नाकाबाट अफ्रिकाबाट आउने यात्रुलाई रोक लगाउने निर्णय गरेको छ । साथै, दक्षिण अफ्रिकी मुलुकका यात्रुलाई रोक्ने र अनअराइभल भिसालाई नदिने निर्णय पनि सरकारले गरिसकेको छ ।