कांग्रेस महाधिवेशन : जम्मा ४६७९ मत खस्यो
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/12/266010949_1006297669920309_5112460176795121031_n.jpg)
काठमाडौं । नेपाली कांग्रेसको १४ औं महाधिवेशन अन्तरगत आज भएकाे मतदानमा करिब ४६७९ मत खसेको छ । नेपाली कांग्रसका ४७४३ मतदाता रहेकोमा करिब ४६७९ मत मात्रै खसेको हो । निर्वाचन समितिकाे आधिकारिक विवरण भने आउन बाँकी रहेकाे छ ।
६४ जना प्रतिनिधि अनुपस्थित रहेका छन् । मतगणना केहीबेरमा सुरु हुने निर्वाचन समितिले जनाएको छ ।
२४ गतेबाट सुरु भएको महाधिवेशन अन्तरगत सोमबार मध्यान्ह करिब १२ बजेबाट मात्रै मतदान सुरु भएको थियो ।
अबको केही बेरपछि नै मतगणना सुरु हुने निर्वाचन समितिका संयोजक गोपालकृष्ण घिमिरेले बताए ।
कांग्रेसको नयाँ नेतृत्वका लागि शेरबहादुर देउवा, शेखर कोइराला, प्रकाशमान सिंह, विमलेन्द्र निधि र कल्याण गुरुङ प्रतिस्पर्धामा रहेका छन् ।
विहान ८ बजेबाट सुरु हुने भनिएको मतदान करिब ४ घण्टा ढिलो गरी सुरु भएको थियो । निर्वाचन समितिले भृकुटीमण्डप र राष्ट्रिय सभागृहस्थल गरी दुई स्थानमा मतदानको व्यवस्था मिलाएको थियो ।
आज सभापतिको मात्रै मतगणना हुनेछ । कांग्रेसको सभापतिमा निर्वाचित हुनका लागि कुल खसेको ५० प्रतिशत बढी मत अर्थात पहिलो चरणमा नै २३४० मत आवश्यक हुन्छ ।
कुनै पनि उम्मेदवारले ५० प्रतिशत भोट ल्याउन नसकेमा फेरि मतदान हुनेछ ।
नेपाली कांग्रेसको यो महाधिवेशनले एक सभापति, दुई उपसभापति, दुई महामन्त्री, आठ सहमहामन्त्रीसहित १३ जना पदाधिकारी चयन गर्नेछ । यस्तै १ सय २१ कांग्रेस केन्द्रीय समिति सदस्य पनि चयन हुनेछ ।