कांग्रेस चुनावको साइड इफेक्ट : रक्षामन्त्रीले राजीनामा दिए, मुख्यमन्त्रीले के गर्छन् ?

सुर्खेत । कर्णाली प्रदेशका मुख्यमन्त्री जीवनबहादुर शाहीले कांग्रेसको सहमहामन्त्री पदमा पराजय चाखेका छन् । उनले सभापति देउवाको शक्तिशाली प्यानलबाट उम्मेदवारी दिएका थिए ।

सरकारी उच्च ओहोदामा रहेर कांग्रेसको चुनाव हार्ने उनी दोस्रो नेता हुन् । रक्षामन्त्री मिनेन्द्र रिजालले महामन्त्रीमा पराजित भएपछि पदबाट राजीनामा दिएका थिए । कतिपयलाई कौतुहल छ, के शाहीले पनि रिजालको पदचिन्ह पछ्याउलान् ? त्यस्तो सम्भावना न्यून देखिएको छ ।

त्यसो त संसदीय चुनावमा जनताको भोट पाएर निर्वाचत भएकाहरु पार्टीको चुनाव हार्दैमा नैतिक दवाव पर्दन भन्ने एकथरि मत छ । अर्कोथरिले चाहिँ आफ्नै पार्टी पंतिले नपत्याएकाहरुसँग देशको जिम्मेवारी सम्हाल्ने नैतिक बल नहुने तर्क गर्छन् ।

तर्क–वितर्क जे भए पनि कर्णालीका मुख्यमन्त्री शाही लामो प्रतिक्षापछि आर्जित मुख्यमन्त्री पदलाई सहजै त्याग्ने पक्षमा छैनन् । सिद्धान्तभन्दा सत्तालाई प्राथमिकतामा राख्ने उनको पृष्ठभूमिले पनि त्यस्तो आशा राखन सकिन्न ।

यीनै शाही हुन्, जसले राजा ज्ञानेन्द्रको २०६१ को माघ १९ कदमलाई समर्थन गर्दै तत्कालीन जिल्ला विकास समिति हुम्लाको सभापति पड्काएका थिए । राजालाई समर्थन गरेका व्यक्तिलाई अहिले मुख्यमन्त्री बनाइएको भन्दै असन्तुष्टिका स्वर नसुनिएका होइनन् । शाहीले प्रदेश लोकसेवा आयोगमा आफ्नै श्रीमतीलाई सदस्य बनाएका छन् ।

मुख्यमन्त्री भएको डेढ महिनासम्म पनि मुख्यमन्त्री शाहीले मन्त्रीपरिषदलाई पुर्णता दिन सकेका छैनन् । यसबाट उनको कार्यक्षमतामा समेत प्रश्न उठ्ने गरेको छ ।

उनी प्रमुख प्रतिपक्षी दलको नेता हुँदा संसदमा कर्णालीका जनता र यस क्षेत्रको सवालमा विभिन्न मुद्दा उठाउने तर तत्कालीन सरकारसंग साँठगाँठ गर्ने गरेको आरोप समेत लाग्ने गरेको थियो ।